Ўзбекистон Болалар ва ўсмирлар адабиёти халқаро кенгашига аъзо бўлди. Бу ҳақда АОКА хабар берди.
Бу нимани англатади?
Энди ўзбек ёзувчилари ва ижодкорлари ҳам ушбу кенгаш томонидан таъсис этилган танловларда қатнашиш ва халқаро миқёсда китобхонлар эътирофига сазовор бўлиш имкониятига эга.
IBBY қандай ташкилот?
Болалар ва ўсмирлар адабиёти халқаро кенгаши (International Board on Books for Young People – IBBY) 1953-йилда Цюрихда (Швейцария) UNESCO’нинг Болалар ва ўсмирлар адабиёти бўйича халқаро кенгаши томонидан ташкил этилган. Кенгашнинг асосий мақсади болалар ва ёшлар адабиётини ривожлантириш, мамлакатлар миллий адабиётини халқаро миқёсга кўтариш ва оммалаштиришга кўмаклашишдир. IBBY айнан шундай мақсадга кўра ижодий ва ижтимоий кучларни бирлаштиради.
Қайд этилишича, шу кунга қадар Ўзбекистон ушбу ташкилотга аъзо бўлмаган. Ташкилот низомига кўра, ҳар бир давлатда Миллий шўба ташкил этилиши мумкин, фақат бунда ташкилотнинг ўзига яраша шартлари ва тўлов суммаси мавжуд.
IBBY’нинг Ўзбекитон Республикаси Миллий шўбаси АОКА ташаббуси билан ташкил этилган.
IBBY’га аъзолик Ўзбекистонга нима беради?
Бундан буён Ўзбекистоннинг барча ижодкорлари, жумладан, болалар ёзувчилари, рассомлар ва бошқа китоб соҳасида меҳнат қилувчи инсонлар халқаро конгрессларда иштирок этиш имкониятига эга бўлади.
“Яна бир қувонарли томони, ўзбек тилидаги болалар адабиётини ҳам жаҳон миқёсида тақдим этиш, ижодкорларимизни турли хил совринларга, жумладан Ҳанс Кристиан Андерсен номидаги соврин учун номзодини илгари суриш имконияти пайдо бўлди”, – дейилади хабарда.
Шунингдек, IBBY ҳар икки йилда бир маротаба миллий шўбаларнинг ҳар биридан кўзга кўринган ёзувчилар, иллюстратор-рассомлар ва таржимонларни эътироф қилиш мақсадида уларнинг энг яхши ишларини “IBBY Honour List” рўйхатига киритади.
IBBY’нинг барча аъзолари учун алоҳида аҳамиятга эга воқеа бу ҳар икки йилда бир марта ўтказиладиган Халқаро болалар адабиёти кенгашининг Бутунжаҳон конгресси ҳисобланади. Миллий шўбага эга ҳар бир давлат Халқаро конгресс мезбони бўлиш имконига эга ва мамлакат мезбонликка ариза бергач, кенгаш ижроия қўмитаси аъзолари томонидан овоз бериш йўли билан аниқланади. Демак, бундай имконият Ўзбекистон Республикаси Миллий шўбасида ҳам мавжуд.
2022 йилги IBBY Конгрессига Малайзия давлати мезбонлик қилади. Ушбу конгрессда Ўзбекистон ҳам қатнашади.
Таъкидланишича, Болалар ва ўсмирлар адабиёти халқаро кенгашига аъзолик бугунги байрам – Халқаро болалар адабиёти куни учун ажойиб совға бўлади:
“Ушбу халқаро ташкилотга аъзолик Ўзбекистонда болалар адабиётининг ривожланиши учун катта манфаат келтиради. Бу юртимизда китобхонликни ривожлантириш, рағбатлантириш ва тарғиб қилиш борасидаги катта қадамдир. Эндиликда IBBY орқали адабиёт борасида ҳам ўзаро ҳамкорликлар олиб борилиши, жумладан ўзбек болалар адабиётининг хорижий тилларга ва хорижий тиллардаги энг машҳур болалар китобларининг ўзбек тилига таржима қилиниши кутилмоқда”.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!