Ўзбекистонда транспортни бошқариш ҳуқуқини олган шахсларга йўл қоидалари бузилгани учун жавобгарликни ўтказиш тартиби жорий этилди. 2026 йил 1 апрелдан бошлаб бу ҳақда ЙИДХП (my.gov.uz) ёки махсус мобил илова орқали хабардор қилиш мумкин бўлади.

Бунинг учун транспорт эгаси ЙИДХП ёки мобил иловада шахсий кабинет очган ҳолда сўровнома тўлдиради ва унда бошқариш ҳуқуқини бериш муддатини кўрсатиб ўтади.

Бошқариш ҳуқуқини олган шахс сўровномани тасдиқлаш орқали келгусида унга нисбатан жарима солиш тўғрисида қарор расмийлаштирилиб борилишига розилигини электрон рақамли имзо ёки “Мобиле-ИД” ёхуд Face-ID орқали тасдиқлайди. Хабардор қилиш хизмати учун БҲМнинг 10 фоизи (42 000 сўм) миқдорида йиғим ундирилади.

Бундан ташқари, мазкур қарор билан қонун ҳужжатларига киритилган ўзгартиришларга кўра, автомототранспорт воситасини рўйхатдан ўтказиш ҳақидаги гувоҳнома (“техпаспорт”) 5 йил муддатга расмийлаштирилиши белгиланди.

• Ҳайдовчи
• Қарор
• Қонун
• Transport
• ЙПХ