Иқтисодиёт ва молия вазирлиги 2024 йилдаги давлат қарзи миқдорини маълум қилди.

Маълум бўлишича, 2024 йил IV чораги якунида давлат қарзи 40,2 миллиард долларга етган. Бу мамлакат ялпи ички маҳсулотининг 35 фоизига тенгдир.

Давлат кафолати остида олинган кредитларнинг 33,7 млрд доллари ёки 84 фоизи ташқи қарз бўлиб, шундан 17,9 млрд доллари қатъий белгиланган фоиз ставкада жалб қилинган. Қолган 15,64 млрд доллари ўзгарувчан фоиз ставкаларда олинган. Бироқ қарз таркиби кўрсатилмаган, кредитлар неча фоиздан жалб қилингани маълум эмас.

Ички қарз миқдори 6,5 миллиард долларга яқинлашган (йил бошида 5,9 миллиард доллар бўлган). Шундан 5,1 миллиард доллар қатъий белгиланган фоиз ставкада олинган. Яна 1,2 млрд доллари фоизсиз жалб қилинган.

Охирги беш йилда давлат қарзи миқдорлари қуйидагича ўзгарган:

– 2019 йилда — 17,8 млрд доллар;

– 2020 йилда — 23,4 млрд доллар;

– 2021 йилда — 26,3 млрд доллар;

– 2022 йилда — 29,2 млрд доллар;

– 2023 йилда — 34,9 млрд доллар.

Иқтисодиёт ва молия вазирлиги экспертлари сўзларига кўра, охирги пайтларда япон иенасининг сезиларли қадрсизланиши Ўзбекистон ташқи қарзини 250 миллион долларга камайтирган.

2024 йилда давлат ташқи қарзи жалб қилишнинг йиллик лимити 5 миллиард доллар этиб белгиланиб, якунида бу миқдор 7,3 миллиард долларга етган эди. 2025 йилда ушбу лимит 5,5 миллиард доллар этиб белгиланган.

• Кредит
• Ўзбекистон
• Ташқи қарз