Ўзбекистон миллий терма жамоаси бош мураббийи Сречко Катанец соғлиғи билан боғлиқ муаммолар сабабли Ўзбекистон футбол ассоциацияси билан тузилган шартномани ўзаро розилик билан бекор қилишга қарор қилди. Словениялик мураббий ўз мурожаатида ҳозирги ҳолатида вазифаларини тўлақонли, профессионал тарзда бажара олмаслигини афсус билан қайд этган. Доимий қўллаб-қувватлагани ва самарали ҳамкорлик учун ассоциацияга ўз миннатдорчилигини билдирган. Терма жамоага Жаҳон чемпионати саралаш баҳсларида омад тилаган.

Ўз навбатида, Ўзбекистон футбол ассоциацияси Сречко Катанецга Ўзбекистон терма жамоаси бошқарувидаги меҳнатларини учун миннатдорчилик билдирган. Унга саломатлигини тиклаб, мураббийлик фаолиятини муваффақиятли давом эттиришини тилаган.

“ЎФА ҳамда Сречко Катанец ўртасидаги шартнома ўзаро дўстона муносабатларни сақлаган ҳолда бекор қилинди. Ўзбекистон футбол ассоциацияси миллий терма жамоамиз бош мураббийи лавозимига муносиб номзод тайинлаш борасида иш олиб бормоқда”, – деб ёзмоқда Ўзбекистон Футбол Ассоциацияси матбуот хизмати.

• Iste'fo
• УФА
• murabbiy