Ўзбекистоннинг “Ўзавиатсия” агентлиги ва “Қозоғистон авиация маъмурияти” АЖ раҳбарлари ўртасида учрашув бўлиб ўтди. Бу ҳақда ЎзА хабар берди.

Қайд этилишича, мазкур учрашувда Арманистон, Грузия, Қозоғистон, Қирғизистон, Мўғулистон, Молдова, Тожикистон ва Ўзбекистон иштирокида “Евросиё Фуқаро авиацияси конференцияси”ни (EACAC - EuraAsian Civil Aviation Conference) ташкил этиш бўйича қўшма ташаббус, шунингдек, парвозлар хавфсизлиги масалалари бўйича идоралар ўртасидаги ҳамкорликни мустаҳкамлашнинг долзарб масалалари муҳокама қилинган.

“Фуқаро авиациясининг Евроосиё конференцияси” авиация соҳасида ҳар бир давлат идоралари ўртасидаги ҳамкорлик концепциясини белгиловчи платформа ҳисобланади.

Дастлабки босқичда EACAC норасмий идоралараро техник ташкилот бўлиб, авиация маъмуриятлари ўртасидаги ўзаро ҳамкорликнинг келажакдаги концепциясини муҳокама қилиш ҳамда қўшма қарорлар қабул қилиш имконини беради.

Шунингдек, учрашув якунлари бўйича томонлар “Евроосиё Фуқаро авиацияси конференцияси – EACAC”ни ташкил этиш ташаббуси тўғрисидаги ҳужжатни имзоладилар.

• Қозоғистон
• авиация