Маҳаллаларда ёшлар билан ишлаш масалаларини мувофиқлаштириш бўйича Республика комиссияси раиси бошчилигидаги делегациянинг Хитой Халқ Республикасига ташрифи давом этмоқда. Бу ҳақда UzA хабар берди.

Ёшлар ишлари агентлиги ахборот хизмати маълумотига кўра, ташриф давомида делегация аъзолари Ланчжоу инвестиция ва савдо форумида иштирок этган. Унда Ўзбекистондаги маҳалла тизими, “еттилик” фаолияти тақдимот орқали намойиш этилган.

Форум давомида юртимиз делегацияси Бутунхитой саноат ва савдо федерацияси Тадбиркор аёллар савдо палатаси ижрочи президенти Чжао Синсзу бошчилигидаги хитойлик тадбиркорлар билан ҳам учрашган.

“Чжао Синсзу Хитой томони Ўзбекистондаги бизнес муҳитига доимо ишонч билан қарашини, ҳамкорликда янги лойиҳаларни бошлашга тайёрлигини билдирган. Ланчжоу инвестиция ва савдо халқаро кўргазмасида Ўзбекистон ўз павильони билан иштирок этди”, дейилади хабарда.

Маълумот учун: мамлакатимиз делегациясининг ХХРга сафари давом этади. Сафар давомида яна бир қатор соҳа ва йўналишларда учрашувлар ўтказилиши режалаштирилган.

• Ҳамкорлик
• Хитой