Ўзбекистонда 2027 йилдан кучга кирадиган Соғлиқни сақлаш вазирлиги буйруғи билан реимбурсация дастури доирасида аҳолига бепул бериладиган дори воситалари рўйхати тасдиқланди.

Мазкур рўйхат Давлат тиббий суғурта жамғармаси билан келишилган бўлиб, унга онкологик, руҳий, юрак-қон томир, эндокрин ва бошқа касалликлар киритилган. Ушбу касалликларни даволаш учун жами 69 турдаги дори воситалари белгиланган. Улар орасида омепразол, трамадол, амброксол, калий йодид, гепарин каби препаратлар бор.

Реимбурсация — бу дори харажатларини қоплаш тизими бўлиб, сурункали касалликларга чалинган беморлар учун шифокор томонидан буюрилган дорилар қийматини қисман ёки тўлиқ қоплашни назарда тутади.

Дори олиш тартиби қандай?
Дастурга кўра, бемор оилавий шифокор ёзган электрон рецепт асосида Жамғарма билан шартнома тузган дорихоналардан дори воситаларини бепул олади.

Рецепт тасдиқлангач, унинг маълумотлари тизим орқали дорихоналарга юборилади ва беморнинг телефонига SMS-хабарнома келади. Дорихонага мурожаат қилинганда, рецепт рақами ва SMS орқали юборилган махсус код тақдим этилади. Шундан сўнг, дастурда тасдиқланган дори воситаси беморга бепул берилади.

Қайд этилишича, ушбу тартиб Вазирлар Маҳкамасининг 2024 йил 2 октябрдаги 619-сон қарорига мувофиқ амалга оширилади.