Фарғона вилоятининг Бешариқ туманида кучли ёғингарчилик оқибатида 90 дан ортиқ хонадон томорқаларини сув босди. Бу ҳақда Фавқулодда вазиятлар вазирлиги хабар берди.

Маълум қилинишича, 1 май куни соат 21:41 да “112” тизими орқали “Ворух Дашт” ва “Янгиқўрғон” МФЙларининг айрим кўчаларидаги уйлар томорқаларига ёмғир сувлари киргани ҳақида хабар келиб тушган.

Ҳодиса жойига вилоят Фавқулодда вазиятлар бошқармаси, вилоят ва туман ҳокимликлари вакиллари зудлик билан етиб бориб, оқибатларни бартараф этиш ишларини бошлаган.

Ҳозирда барча зарур куч ва воситалар жалб этилган, вазият тўлиқ назоратга олинган. Жабрланганлар йўқ.

Мутасаддиларга кўра, ҳодиса оқибатлари қисқа муддатда тўлиқ бартараф этилади.