Германия Мудофаа вазири Борис Писториус АҚШ Президенти Дональд Трампнинг Германиядан қарийб 5 минг нафар америкалик ҳарбий хизматчини олиб чиқиб кетиш ҳақидаги қарорига муносабат билдирди. Бу ҳақда Deutsche Welle хабар берди.

Писториуснинг таъкидлашича, бундай қарор кутилган ҳолат ҳисобланади.

“Америка Қўшма Штатларининг Европадан, жумладан Германиядан ўз қўшинларини қисман олиб чиқиши кутилган эди. Ҳозирда гап Германияда жойлашган қарийб 40 минг нафар америкалик ҳарбийдан 5 минг нафари ҳақида кетмоқда”, — деди у.

Шунга қарамай, Германия АҚШ қўшинларининг Европада бўлиши ҳар икки томон манфаатларига мос келишини таъкидламоқда.

“Биз Рамштайн, Графенвёр, Франкфурт ва бошқа ҳудудларда Европа иттифоқчилари билан биргаликда тинчлик ва хавфсизликни таъминлаш, шунингдек Украина масаласида ҳам ҳамкорлик қилмоқдамиз. АҚШ эса бу ерда Африка ва Яқин Шарқдаги хавфсизлик каби бошқа ҳарбий вазифаларни ҳам амалга оширмоқда”, — деди Писториус.

Нашр қайд этишича, ушбу ҳолат НАТОнинг янада “европалашиши” зарурлигини кўрсатмоқда. Писториус фикрича, Европа давлатлари бундай шароитда ўз хавфсизлиги учун кўпроқ масъулиятни ўз зиммасига олиши керак.

“Армиямиз кенгаймоқда, биз инновацияларга таяниб, кўпроқ техника харид қилмоқдамиз ва инфратузилмани тез суръатларда ривожлантирмоқдамиз”, — дея қўшимча қилди у.