Ўзбекистонда тиббий хизматлар нархларининг қай даражада асосли ва адолатли шакллантирилаётгани юзасидан ўрганиш ишлари олиб борилмоқда. Бу ҳақда Рақобат қўмитаси маълум қилди.Қайд этилишича, жорий йилнинг апрель ойидан бошлаб Республика ихтисослаштирилган илмий-амалий тиббиёт марказларида кўрсатилаётган тиббий хизматлар тарифлари таҳлил қилинмоқда. Ўрганиш давомида хизматлар нархининг шаклланиш механизми, харажатлар таркиби ҳамда амалдаги тарифларнинг иқтисодий асослари кўриб чиқилади.

Мутасаддиларнинг таъкидлашича, таҳлил натижалари асосида тиббий хизматлар тарифларини мақбуллаштириш ва аҳолига янада қулай шароит яратишга қаратилган таклифлар ишлаб чиқилади. Ушбу умумлаштирилган таклифлар кейинчалик ваколатли давлат органларига тақдим этилиши режалаштирилган.Мазкур ташаббус соғлиқни сақлаш тизимида нархларнинг шаффофлигини таъминлаш, хизматлар сифати ва уларнинг аҳолига мақбул бўлиши ўртасидаги мувозанатни сақлашга хизмат қилиши кутилмоқда.