“Ҳайвонот дунёсини муҳофаза қилиш ва ундан фойдаланиш тўғрисида”ги Қонун 43-моддасида ёввойи ҳайвонларни ярим эркин шароитларда, сунъий яратилган яшаш муҳитида ёки тутқунликда сақлашга Экология ва атроф-муҳитни муҳофаза қилиш давлат қўмитаси рухсатномаси асосида йўл қўйилиши белгиланган.

Қўмитанинг таъкидлашича, қонунчилик ҳужжатларида фуқаролар томонидан ёввойи йиртқич ва заҳарли ҳайвонларни уй шароитида сақлаш ҳамда улардан фойдаланиш масаласи ҳуқуқий тартибга солинмасдан қолмоқда.

Шу боис, мазкур қонуннинг 43-моддасига ўзгартиш ва қўшимчалар киритиш тўғрисидаги ҳужжат лойиҳаси ишлаб чиқилди ва жамоатчилик муҳокамасига қўйилди.

Унга кўра, Ўзбекистон Республикаси Экология ва атроф муҳитни муҳофаза қилиш давлат қўмитаси томонидан тасдиқланадиган рўйхатга мувофиқ ёввойи йиртқич ва заҳарли ҳайвонларни сақлаш ҳамда фойдаланиш тақиқланади.

Бундан ушбу модданинг бешинчи қисмида назарда тутилган ҳоллар мустасно. Яъни, юридик шахс мақомига эга бўлган ҳайвонот боғлари, террариумлар, цирклар, океанариумлар, дельфинарийлар ва табиий питомниклар ҳамда илмий ва ўқув мақсадлари учун илмий ва таълим ташкилотлари ёввойи йиртқич ва заҳарли ҳайвонларни Ўзбекистон Республикаси Экология ва атроф муҳитни муҳофаза қилиш давлат қўмитаси рухсатномаси асосида, Ўзбекистон Республикаси Фанлар академияси билан келишган ҳолда ташкил этиладиган махсус питомникларда сақлаши ҳамда фойдаланиши мумкин.

Шунингдек, мазкур қонуннинг Экология ва атроф муҳитни муҳофаза қилиш давлат қўмитасининг ҳайвонот дунёсини муҳофаза қилиш ва ундан фойдаланиш соҳасидаги ваколатлари доирасига “сақлаш ва фойдаланиш тақиқланган ёввойи йиртқич ва заҳарли ҳайвонларни рўйхатини тасдиқлаш” ҳам киритилмоқда.

Маълумот учун, Қозоғистон, Россия Федерацияси ва Беларусь Республикасида Ҳукумат ёки экология соҳасидаги махсус ваколатли орган томонидан тасдиқланган рўйхатда назарда тутилган ёввойи йиртқич ва заҳарли ҳайвонларни ярим эркин шароитларда, сунъий яратилган яшаш муҳитида ёки тутқунликда сақлаш тақиқланган.

• Экология
• Ҳайвон
• Лойиҳа
• Йиртқич