Тошкент шаҳридаги “Hilton Tashkent City” меҳмонхонасида ўтказилган III Ўзбекистон – Россия медиа форумида икки мамлакат ўртасидаги ахборот соҳасидаги ҳамкорлик, медиа хавфсизлиги ва рақамли технологияларни ривожлантириш масалалари муҳокама қилинди. Икки кунлик анжуманда давлат идоралари, етакчи медиа ташкилотлари, IT сектори ва креатив индустрия вакилларидан 200 нафардан ортиқ иштирокчи қатнашмоқда.

Форумнинг очилиш маросими ва ялпи мажлисида Ўзбекистон Республикаси Президенти Администрацияси Коммуникациялар департаменти бошлиғи – Президент матбуот котиби Шерзод Асадов нутқ сўзлади. У Ўзбекистон ва Россия ўртасидаги медиа ҳамкорликни ривожлантиришда ўзаро ишонч, тажриба алмашиш ва профессионал алоқаларни мустаҳкамлаш муҳимлигини таъкидлади.

Тадбирда Ўзбекистон медиа маконида амалга оширилган ўзгаришлар ҳақида ҳам маълумот берилди. Қайд этилишича, мамлакатда фаолият юритаётган қарийб 2 700 та оммавий ахборот воситасининг 67 фоизи хусусий секторга тегишли. Жорий йилда 15 минг номдаги китоб 60 миллион нусхадан ортиқ ададда чоп этилган. Интернет қамрови эса 94 фоизга етган.

Шунингдек, мамлакатда фаол контент истеъмолчилари сони 32,7 миллиондан ошгани, йил давомида Контент маркази томонидан тайёрланган 26 мингдан ортиқ медиа маҳсулот қарийб 2 миллиард марта томоша қилингани таъкидланди. Миллий медиабанк ҳам ишга туширилиб, Ўзбекистон ҳақидаги фото ва видеоматериаллар очиқ фойдаланиш учун тақдим этилган.

Форумда дезинформация, сохта хабарлар ва сунъий интеллект ёрдамида яратилган deepfake контентларга қарши курашиш масалаларига алоҳида эътибор қаратилди. Шерзод Асадов ахборотнинг ҳаққонийлигини таъминлаш ва манипуляцияларнинг олдини олиш медиа ташкилотларининг муҳим вазифаларидан бири эканини қайд этди.

Шу билан бирга, Ўзбекистон ва Россия ўртасидаги медиа ҳамкорликни ривожлантириш бўйича тўртта устувор йўналиш илгари сурилди. Булар журналистлар малакасини ошириш ва кадрлар тайёрлаш, дезинформацияга қарши биргаликда курашиш, рақамли технологиялар ва сунъий интеллект соҳасида қўшма ишланмаларни йўлга қўйиш, шунингдек, таҳририятлар, журналистлар ва блогерлар ўртасидаги тўғридан-тўғри алоқаларни кенгайтиришдан иборат.

Маълумотларга кўра, Ўзбекистонда дезинформацияга қарши курашиш бўйича махсус таълим платформаси орқали 11 минг нафар ёш мутахассис ўқитилган.

Форум доирасида тўртта панель сессияси, кибермаконда ахборот хавфсизлиги ва болаларни ҳимоя қилишга бағишланган махсус семинар ҳамда бизнес вакиллари ўртасида B2B музокаралари ўтказилмоқда.