Ўзбекистонда куз-қиш мавсумида аҳолига ажратилган газ ва кўмир маҳсулотларини ўз вақтида ҳамда тўлиқ етказиб бериш устидан назорат кучайтирилади. Бир ой давомида ноқонуний муомаладан қарийб 93 тонна суюлтирилган газ, 9 139 дона газ баллони ва 333 тоннадан ортиқ кўмир мусодара қилинган. Бу ҳақда Ички ишлар вазирлиги матбуот хизмати хабар берди.

Маълум қилинишича, ички ишлар вазири Азиз Тошпўлатов иштирокида ўтказилган йиғилишда энергетика ресурсларини ташиш ва тақсимлаш жараёнларидаги қонунбузарликларнинг олдини олиш масалалари муҳокама қилинган. Масъулларга газ баллонларини белгиланган график асосида етказиш, ресурслар ҳисобини юритиш ва истеъмолчилардан асоссиз тўловлар талаб қилинишига йўл қўймаслик бўйича топшириқлар берилган.

ИИВ маълумотларига кўра, ўтган бир ойда кўмир маҳсулотини ноқонуний сақлаш ва сотиш билан боғлиқ 16 та ҳолат аниқланган. Натижада 333 тонна 540 килограмм кўмир мусодара қилиниб, аҳолининг эҳтиёжлари учун йўналтирилган. Суюлтирилган газ билан боғлиқ 374 та қонунбузарлик ҳолати аниқланиб, 9 139 дона газ баллони ҳамда 92 тонна 936 килограмм суюлтирилган газ ноқонуний муомаладан олинган.

Шунингдек, октябрь ойида Самарқанд вилоятида “Пастдарғомтумангаз” газ таъминоти корхонаси ходимлари аҳоли учун ажратилган газни ноқонуний ўзлаштираётгани аниқланган. Тезкор тадбир давомида қиймати 32 миллион сўмлик 3 тонна 100 килограмм углеводород гази мусодара қилинган.

Мазкур ҳолат юзасидан корхона ходимларига нисбатан Жиноят кодексининг 167-моддаси 2-қисми “в” банди билан жиноят иши қўзғатилган. Ҳозирда ҳолатнинг бошқа тафсилотлари аниқланмоқда.

Йиғилиш якунида масъулларга газ ва кўмир таъминотидаги муаммоларни ўрганиш, энергетика маҳсулотларининг ташилиши ва манзилга етказилишини назорат қилиш, газ омборлари ҳамда тақсимлаш базаларида қўриқлаш чораларини кучайтириш топширилган.