Испаниялик рассом Пабло Пикассонинг “Соатли аёл” картинаси 139,4 миллион долларга сотилди. Бу рассомнинг энг катта суммага сотилган иккинчи асари ҳисобланади.

Маълумотларга кўра, сурат 2023 йилда кимошди савдосида сотилган энг қиммат расмга айланди. Унинг дастлабки нархи тахминан 120 миллион долларга баҳоланганди. Сўнг салкам 140 млн долларга харид қилинган.

Расм 1932 йили 130х97 см ўлчамда чизилган. Унда Пикассонинг севгилиси Мари-Терез Валтер қўл соати билан бирга тасвирланган.

1966 йили бу асарни Базелдаги Беелер галереяси сотиб олган. 1968 йилда Нью-Йоркдаги Пасе галереяси коллекциясига қўшилган.

Кейинроқ "Соатли аёл" сурати коллекционер Эмили Фишер Ландау томонидан сотиб олинган ва 50 йилдан кўпроқ вақт давомида унинг квартирасида сақланган.

Коллекциячи 2023 йил март ойида вафот этгандан сўнг, Sothebyʼs аукцион уйи унинг 400 миллион долларга яқин 120 та асардан иборат коллекциясини сотиш ҳуқуқини қўлга киритган.

Эслатиб ўтамиз, 2021 йил октябрь ойида Гонконгда Пикассонинг “Чақираётган аёл” картинаси 24,6 миллион долларга сотилганди.

• Rasm
• pul
• рассом