Россия президенти Владимир Путин Сурия президенти Башар Асад билан кеча, 24 июль куни учрашув ўтказган. Бу ҳақда Кремль матбуот хизмати хабар берди.

Улар мазкур учрашувда Яқин Шарқдаги вазиятни муҳокама қилишган.

Шунингдек, учрашувда Россия Туркия ва Сурия муносабатларини яхшилашдан манфаатдор эканлиги айтилган. Путин Асаднинг минтақадаги вазият ҳақидаги фикрини тинглашдан жуда манфаатдор эканини қайд этиб, минтақадаги вазият тобора ёмонлашаётганини таъкидлаган.

Путин, шунингдек, Россия ва Сурия ўртасидаги савдо-иқтисодий муносабатларда истиқболли йўналишлар мавжудлигини, бироқ бу соҳада кўплаб саволлар қолаётганини қўшимча қилган.

Ўз навбатида Асад бугунги ташриф давлатлар ўртасида дипломатик муносабатлар ўрнатилганининг 80 йиллигига тўғри келишини эслатиб ўтган.

Маълумот ўрнида, Асад сўнгги марта Москвага бир йил аввал — 2023 йилнинг март ойида ташриф буюрган эди.

• Путин
• Россия
• Suriya