22-27 июль кунлари Фарғонада Қирғизистон-Ўзбекистон давлат чегарасини демаркация қилиш масалалари бўйича навбатдаги учрашув бўлиб ўтди. Бу ҳақда “Кактус медиа” хабар берди.

Маълум бўлишича, музокаралар давомида Қирғизистон ва Ўзбекистон ҳукумат делегацияларининг ишчи гуруҳлари демаркациянинг долзарб масалаларини кўриб чиқишган.

Учрашув доирасида Қирғизистоннинг Жалолобод ва Баткен вилоятлари доирасида Қирғизистон-Ўзбекистон давлат чегарасининг айрим участкаларида, шунингдек, Ўзбекистоннинг Наманган ва Фарғона вилоятларининг қўшни участкаларида дала тадқиқотлари ўтказилган.

Таъкидланишича, музокаралар дўстлик ва ўзаро тушуниш муҳитида ўтган, бу эса конструктив мулоқот ва ўзаро келишувга ёрдам берган. Шунингдек, тадбирлар якунлари бўйича эришилган келишувларни мустаҳкамлайдиган тегишли протокол имзоланган.

Қайд этилишича, ишчи гуруҳларнинг навбатдаги учрашуви Қирғизистон ҳудудида бўлиб ўтади.

• Чегара
• Қирғизистон