Қозоғистон Республикаси Рақамли ривожланиш, инновациялар ва аэрокосмик саноат вазирлиги Хитой билан меморандум имзолаганини эълон қилди. Унга кўра Қозоғистон Ойда тадқиқот базасига эга бўлади. Бу ҳақда “Казинформ” хабар берди.

Қайд этилишича, Қозоғистон ва хитойлик тадқиқотчилар космик технологиялар ва илм-фан соҳасида ҳамкорликда илмий тадқиқотлар олиб бориш, тажриба ва билим алмашиш ниятида. Шу билан бирга, Қозоғистонда Халқаро илмий Ой станциясини қуриш лойиҳаси маҳаллий ой телескопини ишлаб чиқиш ва ишга туширишни ўз ичига олади.

“Қозоғистоннинг ҳиссаси, шунингдек, илмий-техник инфратузилмани мустаҳкамлаш ва хитойлик мутахассислар билан тажриба алмашишни ўз ичига олади”, – дея тушунтирди Рақамли ривожланиш вазирлиги.

Хитой томони билан меморандум 2024 йил июль ойида имзоланган.