Қозоғистон парламенти қуйи палатаси (Мажилис) депутати Азамат Абилдаев Россия президенти Владимир Путин ва Украинадаги ҳарбий можарони қўллаб-қувватлагани учун “Ақ Жол” партияси таркибидан чиқариб юборилди. Бу ҳақда партия матбуот хизмати хабар берди.

“Азамат Абилдаевни “Ақ Жол” демократик партиясидан чиқариш тўғрисида қарор қабул қилинди”, – дейилади партия баёнотида.

Бундан ташқари, “Ақ Жол” партияси мамлакат Марказий сайлов комиссиясига Абилдаевнинг депутатлик мандати тугатилгани ҳақида хат ҳам юборган.

Партиянинг тушунтиришича, сиёсатчининг сўзлари унинг позициясига зид, шунингдек, партиявий ва депутатлик этикасини бузади. Улар, шунингдек, “Ақ Жол” Қозоғистонга дўст бўлган давлатларнинг “мустақиллиги ва ҳудудий яхлитлигини ҳурмат қилади ва қўллаб-қувватлайди”.

18 январь куни Азимат Абилдаев “Озодлик” радиосига берган интервьюсида Владимир Путинни ва урушни қўллаб-қувватлашини айтган.

“Мен Украина халқининг ўзи ёз фаслигача Зеленскийни судга беришига ишонаман”, – дея қўшимча қилган депутат.

Шундан сўнг “Ак Жол” раиси Азат Перуашев Абилдаевнинг сўзлари “унинг шахсий фикри” эканини айтган.

“Биз партия сифатида, биринчи навбатда, мустақиллигимизни, мамлакатнинг ҳудудий яхлитлигини ҳимоя қилишимиз керак”, – деди Перуашев.

Партия раҳбарининг сўзларига кўра, “Ақ Жол” Украинадаги ҳарбий можарони қўллаб-қувватламайди.

• Депутат
• Қозоғистон