Украина президенти Володимир Зеленский Россияни G20 дан чиқариб ташлаш керак, деб ҳисоблайди. У Москванинг “дон келишуви”даги иштирокини тўхтатиш ҳақидаги қарорига шундай муносабат билдирган.

“Энди бизга қаттиқ халқаро реакция керак: ҳам БМТ даражасида, ҳам бошқа даражаларда, хусусан, G20 даражасида”, — дейди Зеленский видеомурожаатида.

Унинг фикрича, Россия Федерациясининг қарори бир неча қитъаларда очлик билан боғлиқ вазиятни янада оғирлаштиради.

Украина президенти Россиянинг G20 аъзолигини “бемаънилик” деб ҳисоблайди.

“Россияга G20да жой йўқ”, - дея қўшимча қилди Володимир Зеленский.

Эслатиб ўтамиз, кеча, 29 октябрь куни Россия “дон битими” тўхтатилганини эълон қилди. Ушбу қарор Қора денгиз флоти кемалари ва “дон йўлаги” хавфсизлигини таъминлашда иштирок этган фуқаролик кемаларига ҳужум уюштирилгани билан изоҳланган. Қора денгиз дон ташаббуси Украина донини экспорт қилиш учун Одесса портларини очишни ва Россиядан озиқ-овқат ва ўғитларни етказиб беришга таъсир кўрсатган санкцияларни бекор қилишни назарда тутган.

Маълумот учун, G20 энг йирик ривожланган ва ривожланаётган иқтисодиётларни бирлаштирган норасмий ташкилотдир. У Австралия, Аргентина, Бразилия, Буюк Британия, Германия, Европа Иттифоқи, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, Жанубий Корея, Жанубий Африка, Японияни ўз ичига олади.

• G20
• Россия
• Зеленский