Самарқанд вилоятида вояга етмаган қизни ўғирлаб кетган тўрт киши жиноий жавобгарликка тортилди. Иш материалларига кўра, 1998 йилда туғилган Б.Ғ. 2025 йил 6 август куни эрталаб танишлари — У.З., А.М. ва М.М. билан олдиндан тил бириктириб, вояга етмаган қизни ўғирлаб кетган.

Шу куни тонгда улар А.М. бошқарувидаги Nexia русумли машинада Каттақўрғон тумани бўйлаб кетаётганида йўлни кесиб ўтаётган бир қизни (2011 йилда туғилган) кўрган. У нон сотиб олиш учун кўчанинг нариги томонидаги дўконга кетаётган бўлган.

Б.Ғ. ва У.З. қизнинг олдига бориб, уни уриб-дўппослаган, жисмоний куч ишлатиб, сочларидан тортган ва автомашинага мажбурлаб миндирган. Кун.узънинг ёзишича, ушбу шахслар бироз вақт ўтгач, қизни ўша жойга қайтариб олиб келган.

Б.Ғ. ва унинг шериклари суд мажлисида ўз айбларини тўлиқ тан олган, аммо “хато қилишганини” айтган. Унинг сўзларига кўра, аввалги тунда у дўстларини “ўтириш” учун тўплаган. Пиво сотиб олгандан сўнг, улар Нарпай канали бўйига йўл олган ва у ерда тонг отгунча ичган.

Тонг ота бошлагани сабабли У.З. уйига қайтиши кераклигини айтди. А.М. уни уйигача олиб боришини, сўнг машинани газ билан тўлдириб олишини айтди. Биз барчамиз машинага ўтирдик. “Навбаҳор” маҳалласидаги “Азизбек” чойхонаси ёнидан ўтаётганимизда, йўлнинг ўнг томонида бизга нотаниш бир қизни кўриб қолдик. Шу пайт У.З.: “Машинани тўхтатинг, бу менинг танишим, тунги клубларда юрадиган қиз”, деб айтди, — дея кўрсатма берди Б.Ғ. судда.

Маст ҳолатда бўлган эркаклар қиз билан жинсий алоқа қилишни истаган.

Машинага мажбуран ўтқазилган ўсмир қиз йиғлаб, қўйиб юборишларини илтимос қилган, онаси уни нонга юборганини айтиб, қўлидаги 8000 сўмни кўрсатган. Ўшанда А.М. қизга улар ИИБ ходимлари эканини айтган. “Бир қиз онасини ўлдириб, қочиб кетди. Шунинг учун биз сени тўхтатиб, машинага ўтқаздик”, – деган у қизга.

Б.Ғ. У.З.дан бу ўша қиз экани ёки хато қилгани ҳақида сўраган. У.З. хато қилганини тасдиқлаган. Шундан сўнг эркаклар уни олиб кетишган жойига олиб борган ва ўша ерда қолдирган.

Каттақўрғон тумани Жиноят ишлари бўйича судининг 2025 йил 16 декабрдаги ҳукми билан улар Жиноят кодексининг 137-моддаси (одам ўғирлаш) 2-қисмининг “а” ва “в” бандларида назарда тутилган жиноятни содир этганликда айбдор деб топилган. Б.Ғ. 5,5 йилга, М.М., А.М. ва У.З. эса 5 йилдан озодликдан маҳрум қилинган.

2026 йилнинг 27 январь куни Самарқанд вилоят суди жиноят ишлари бўйича апелляция инстанцияси жиноят ишлари бўйича Каттақўрғон туман суди судланувчи А.М.га оид қисмини ўзгаришсиз, апелляция шикояти қаноатлантирилмасдан қолдириш бўйича ажрим қилган.

• Жиноят
• Самарқанд
• Суд