Сенегалда мухолиф сиёсатчилар ва ҳукмрон партия ўртасидаги қарама-қаршилик қонун чиқарувчи органдаги тўқнашувга айланиб кетди. Бу ҳақда “Reuters” хабар тарқатди.

Жорий йилнинг 1 декабр куни Сенегал парламентида мухолифатдаги депутатлардан бири ҳукмрон коалициядаги аёл ҳамкасбига тарсаки туширганидан сўнг оммавий жанжал бошланди.

Африка мамлакати мухолиф сиёсатчилари ва ҳукмрон партия ўртасидаги қарама-қаршилик Сенегал президенти Макки Саллнинг гўёки 2024 йилда учинчи муддатга сайланиш ниятида эканлиги билан боғлиқ.

Мухолифат фикрича, амалдаги президент бундай қадами билан аввалроқ берган ваъдасини бузган бўлади. 60 ёшли Салл тарафдорлари у конституцияга киритилган ўзгартириш туфайли яна номзодини қўйиши мумкинлигини айтишмоқда.

Мухолифатчи депутат Массата Самб парламентда сўзлаган нутқида мамлакатнинг руҳий етакчиси президентнинг учинчи муддатга сайланишига қарши эканлигини ва уни танқид қилганлар руҳонийни ҳақорат қилишини эслатди.

Ҳукмрон коалиция депутати Эми Ндиае Гнибиа бу сўздан сўнг кулиб юборган. Мухолифатчи бунга чидай олмаган ва ҳамкасбига яқинлашиб, унинг юзига шапалоқ тушурган. Бу бошқа депутатлар ўртасидаги муштлашувнинг бошланиши бўлди.

Сиёсатчиларнинг ўзаро муштлашув, айбловлар ва ҳақоратлари сабаб парламент мажлисини тўхтатишга тўғри келди.

Муштлашув тасвирлари ижтимоий тармоқларда тарқалди ва аёлларга нисбатан зўравонлик ҳақида муҳокамаларга сабаб бўлди.

• Parlament
• Президент
• Senegal