Ёзувчи Стефени Майер асари асосида ишланган ва миллионлаб томошабинларнинг эътирофига сазовор бўлган “Шафақ” франшизаси сюжети асосида сериал суратга олиниши маълум бўлди. Айни вақтда ижодкорлар сериал сюжети устида ишлашни бошлаб юборишган.

Маълумотларга кўра, сериал сценарийсини тайёрлаш вазифаси “Мени алда”, “Бўрилар томонидан тарбияланган” ва шу каби кўплаб лойиҳалар билан ишлашда улкан тажрибага эга бўлган Шинейд Дейлига топширилган.

Ижодкорлар гуруҳи таркибига, шунингдек, “Шафақ” фильмининг ижрочи продюсерлари – Вик Годфри, Эрик Фейг киритилган. Ёзувчи Стефени Майернинг ўзи ҳам сериални суратга олиш жараёнида иштирок этиши мумкин.

Эслатиб ўтамиз, “Шафақ” франшизаси ўз вақтида жаҳон кинопрокатидан 3,4 миллиард доллар миқдорида даромад олган эди.

Сериал Мейер асарларининг ремейки бўладими ёки унда томошабинларга бутунлай янги воқеалар намойиш этиладими – буниси ҳозирча аниқ эмас.

• Кино
• Сериал
• ijod
• машҳурлар