Самарқанд шаҳрида фуқарони Умра зиёратига юборишни ваъда қилиб, бунинг эвазига 3 минг АҚШ доллари талаб қилган туристик фирма раҳбари қўлга олинди. Бу ҳақда Дин ишлари бўйича қўмита хабар берди.

Маълум қилинишича, ҳолат жорий йилнинг 14 октябрь куни Бош прокуратура ҳузуридаги Иқтисодий жиноятларга қарши курашиш департаменти, Давлат хавфсизлик хизмати ҳамда Ички ишлар вазирлиги ходимлари ҳамкорлигида ўтказилган тезкор тадбир давомида аниқланган.

Туристик фирма раҳбари Н.М. фуқарога Умра зиёратини ташкил этиш хизматини таклиф қилиб, бунинг учун 3 минг доллар талаб қилган. У пулни олаётган вақтида ашёвий далиллар билан қўлга олинган.

Мазкур ҳолат юзасидан Н.М.га нисбатан Жиноят кодексининг 168-моддаси (фирибгарлик) билан жиноят иши қўзғатилган. Ҳозирда терговга қадар текширув олиб борилмоқда.

Дин ишлари бўйича қўмита Умра зиёратини ташкил этиш ва ўтказиш фақат махсус лицензияга эга юридик шахслар томонидан амалга оширилиши мумкинлигини эслатиб, фуқароларни хизмат кўрсатувчи ташкилот лицензиясини олдиндан текширишга чақирди.