Ёш бўлишимга қарамасдан сўнгги бир ярим йил ичида депрессияда юрдим. Тўғри, депрессия сўзининг сийқаси чиқиб кетган. Лекин, тан олишни хоҳламасакда бу бор нарса ва дунё бўйича ҳозир авж олган. Депрессия бу — руҳиятнинг жиддий бузилиши. Мен ҳам сизлардек оддий одамман. Ўз кечинмаларимни сизлар билан бўлишмоқчиман. Агар сизларда ҳам шу жараён кетаётган бўлса, бу мақолам ва тажрибам орқали озгина ёрдамим тегса, албатта хурсанд бўламан.

Хуллас, ҳаётим изидан чиқа бошлади, менда асабийлик кучайди. Овқат ейман, лекин тўйиш ҳисси, таомнинг мазаси, шукроналик йўқолди. Ўзимга бўлган ишончни ва орзу қилишни унутдим. Мен фақат яшардим, танам тирик эди, холос. Танам тирик дейману у ҳам чарчаган, рангим хиралашиб борарди, турли тошмалар юзимни “безарди”. Тобора атрофдагилардан узоқлашардим, инсонлар билан кам мулоқотда бўлардим. Бир тарафдан сифатсиз уйқу қийнарди, 10 соат ухласамда, уйқуга тўймасдим, чарчаб, кайфиятим ёмон ҳолда уйг ъонардим. Эътибор берсам бошқаларда ҳам шу аҳвол. Ўзимни ўнглашга шунчалар ҳаракат қилсамда, фойдаси бўлмасди.

Интернетни тита бошладим. Жаҳон тажрибаларини кузатдим. Олимларнинг ва оддий одамларнинг тавсияларини кўриб чиқдим. Барчасининг гапи бир жойга бориб тақаларди — шакарга! Кўпчилик шакарсиз челленжини қилишгандан сўнг ҳаёт сифати яхшиланганини таъкидлашганди.

Ростдан ҳам эътибор берсам, рационимда ширин маҳсулотлар кўпайиб кетибди: қаҳва, газли ичимликлар, шоколад, пирожний, пирог, торт, печенье ва бошқалар. Ўз устимда шуғулланишга қарор қилдим ва ваъда бердим. Шундан бошлаб 1 ой давомида шакар ва таркибида шакар бўлган маҳсулотлардан воз кечаман, дедим. Бу фақат нафсимни тийиш орқали ҳаёт сифатимни яхшилаш эмас, балки ирода кучимни синаб кўриш ҳам эди. Хўш, мен буни уддалай олдимми?

17 майдан 17 июнга қадар муддат белгилаб олдим. Демак, жанг бошланди!

1-ҳафта оддий ўтди, организмим шакарни талаб қилмади.

2-ҳафта ҳақиқий қийноқлар бошланди, ширин нарсани егим, ичгим келаверарди. Хаёлимда худди ҳозир шуни емасам қанд касалини орттириб оладигандек туйилаверди. Аммо бу босқичдан ҳам ўтдим.

3-ҳафта энг оғир кунларим бўлди. Яна шу қорним тўйганини билмадим ва таъмни ҳис қилмай қўйдим. Нима еяпман, нима ичяпман умуман фарқини сезмасдим.

4-ҳафтада эса иштаҳам бўғилиб, ҳеч нарса егим келмай қолди. Юқоридаги ҳафталарда шакарнинг ўрнини мевалар билан, яъни улардаги фруктоза билан босишга ҳаракат қилдим. Ҳар хил мева еяверардим: шафтоли, нок, ўрик, олма, банан фойдаси бўлмасди.

Мен мана шу 1 ой ичида шакарсиз қийналдим. Катта-катта супермаркетларга кираман, аммо маҳсулотларнинг 99 фоизи шакарли бўларди. Ваъдамга вафо қилдим. 1 грамм ҳам ширин нарса емадим, ичмадим.

1 ойлик курашим эвазига нимага эришдим? Мақсадимга ета олдимми?

Ҳа, албатта. “Оқ ажал”дан воз кечиш эвазига мен ўз руҳий ва жисмоний саломатлигимни тиклай олдим. Ўзимга ишончим ортди. Ишлашга лаёқатим кучайди, миямдаги ғоялар генератори ишлай бошлади. Ҳаётга қизиқиб, янгиликларга интила бошладим.

Кўзимнинг атрофидаги қорайишлар кетди, рангим тиниқлашди, уйқум яхшиланди. 3 соат ухласам, кучга тўлиб, яхши кайфиятда уйғонишни бошладим. Танамдаги шишлар мени тарк этди. Аввалгидек ихчамлашдим. Ўзимни енгил ҳис этардим. Мана ҳаёт, мана ҳақиқат деб юбордим. Ҳозир ҳам камдан-кам ширинлик ейман, газли ичимликларни деярли ичмайман. Организмим талаб ҳам қилмай қўйган.

Мен бу мақоламни илмий тилда қандайдир гормон, моддалар номларини ва нормаларини қўшмасдан, оддийгина қилиб тушунтиришга ҳаракат қилдим. Агар сизни шакарнинг таркиби ва таъсири, қандай ишлаши қизиқтирса, интернет манбаларидан билиб олишингиз ва маълумотларингизни тўлдиришингиз мумкин.

Азиз ўқувчи, ҳаётингиз сизни қониқтирмаётган бўлса ва бу нимадан эканлигини билмасангиз, шакарсиз челленжда қатнашиб кўринг. Натижаси билан бўлишарсиз.

Тажриба ва мақола муаллифи Мунисахоним Ирисова

• Фойдали
• Lifestyle
• Шакар
• Tavsiya
• саломатлик