Восит Воҳидов номидаги Республика ихтисослаштирилган хирургия илмий-амалий тиббиёт маркази ўзининг 50 йиллигини нишонламоқда. Ушбу қутлуғ сана муносабати билан ташкил этилган тантанали тадбирда Ўзбекистон Республикаси Президентининг марказ жамоасига табригини Шерзод Асадов ўқиб эшиттирди.

“Ўзбекистонда жарроҳлик бўйича етакчи ва нуфузли муассаса ҳисобланган ушбу марказ кўпмиллатли аҳил жамоасининг фидокорона меҳнати билан мамлакатимиз соғлиқни сақлаш тизимида алоҳида ўрин эгаллаб келаётганини барчамиз яхши биламиз ва юксак қадрлаймиз”, - дейилади давлатимиз раҳбарининг қутловида.

Айниқса, сўнгги йилларда мазкур шифохонада 200 дан ортиқ янги жарроҳлик амалиёти жорий этилиб,  энг мураккаб ва юқори технологик операциялар бажарилмоқда. Табрикда қайд этилганидек, оғир хасталиклардан азият чекаётган қанча-қанча юртдошларимиз кўп вақт ва маблағ эвазига хориждаги клиникаларга бориш азобидан қутулиб, ўзимизда даво топмоқда.

Бундай натижаларга эришишда мамлакатимизда хирургия хизматини ислоҳ этиш, ҳудудларда унинг сифатини ошириш ва кўламини кенгайтириш, марказ ва унинг филиаллари моддий-техник базаси ҳамда кадрлар салоҳиятини мустаҳкамлаш борасидаги ишлар муҳим омил бўлмоқда.

Шунингдек, Президентимиз марказнинг бутун жамоасига чин дилдан миннатдорлик билдириб, ўзининг эзгу тилакларини изҳор этган.

• Шавкат Мирзиёев
• Табрик
• Тиббиёт
• Тошкент