Бугун, 26 октябрь куни Қирғиз Республикаси Бишкек шаҳрида Шанхай ҳамкорлик ташкилоти ҳукумат раҳбарлари кенгашининг мажлиси бўлиб ўтди.

Унда Ҳиндистон ташқи ишлар вазири Субраманям Жайшанкар, Эрон биринчи вице-президенти Мохаммад Мохбер, Қозоғистон Бош вазири Алихан Смаилов, Хитой Давлат кенгаши Бош вазири Ли Сян, Қирғизистон Бош вазири Ақилбек Жапаров, Покистон ташқи ишлар вазири Жалил Аббас Жилани, Россия ҳукумати раиси Михаил Мишустин, Тожикистон Бош вазири Коҳир Расулзода, Ўзбекистон Бош вазири Абдулла Арипов ҳамда ШҲТ бош котиби Чжан Мин ва Ташкилотнинг Минтақавий аксилтеррор тузилмаси Ижроия қўмитаси директори Руслан Мирзаев ҳам қатнашди.

Кузатувчи мамлакатлар ва фахрий меҳмонлар сифатида мажлисда Беларус Бош вазири Роман Головченко, Мўғулистон Бош вазири Лувсаннамсрайн Оюун-Ердене, Туркманистон Вазирлар Маҳкамаси раиси ўринбосари Хожамират Гелдимирадов ҳамда Мустақил Давлатлар Ҳамдўстлиги Бош котиби Сергей Лебедев, Евроосиё иқтисодий комиссияси Ҳайъати раиси Михаил Мясникович иштирок этди.

“Ала-Арча” давлат қароргоҳида мажлис қатнашчиларини дастлаб Қирғиз Республикаси Президенти Садир Жапаров қабул қилди. Шундан сўнг, ҳукумат раҳбарларининг кенгайтирилган таркибда мажлиси бўлди. Уни Қирғиз Республикаси Бош вазири Ақилбек Жапаров очди.

Бугунги кунда кўплаб давлатлар янги хавф ва таҳдидларнинг оқибатларини бошдан кечирмоқда. Бундай мураккаб шароитда барқарор ривожланишни таъминлаш ва халқларимиз турмуш даражасини юксалтиришга қаратилган ўзаро манфаатли савдо-иқтисодий ва сармоявий ҳамкорликни кенгайтириш ШҲТнинг устувор вазифаларидан бири экани таъкидланди.

Ўзбекистон Республикаси Президенти Шавкат Мирзиёев Деҳли саммитида сўзлаган нутқида ШҲТ улкан иқтисодий имкониятлар ҳудуди, барча мамлакатларнинг узоқ муддатли барқарор ривожланиши учун платформа ва ресурс базаси эканлигини таъкидлади.

Чиндан ҳам, ўтган йил якунларига кўра Ўзбекистоннинг ШҲТга аъзо давлатлар билан ташқи савдо айланмаси 22 фоиз ошган.
Биргина шу йил бошидан буён Ўзбекистонда ШҲТга аъзо давлатлар компаниялари иштирокида мингдан ортиқ янги корхона ташкил этилди ва уларнинг умумий сони 8 мингга етди.

Ўзбекистон Республикаси Бош вазири Абдулла Арипов сўзлаган нутқида мазкур ташаббусларни амалга ошириш мақсадида умумий саъй-ҳаракатларни бирлаштиришга чақирди.

Ўзбекистон Республикаси Бош вазири Абдулла Арипов сўзлаган нутқида ШҲТ доирасида савдо, инвестиция, транспорт ва логистика, саноат кооперацияси, инновация, озиқ-овқат хавфсизлиги, туризм, экология, ҳудудлараро ҳамкорлик, ёшлар сиёсати, спорт ва бошқа йўналишлар бўйича ўзаро манфаатли кўп томонлама ҳамкорликни янада ривожлантиришга чақирди.

Тадбир якунида ШҲТга аъзо давлатлар ҳукумат раҳбарлари Қушма коммюнике қабул қилди ҳамда Ташкилот фаолиятига тегишли 13 та ҳужжатни имзолади. ШҲТ ҳукумат раҳбарлари кенгашининг навбатдаги мажлиси 2024 йилда Покистонда бўлиб ўтади.

• Президент
• ШҲТ
• саммит