Намойишлар тинмаётган Шри-Ланкада мамлакат президенти Готабая Ражапакса расмийларга 3700 метрик тонна дизел ёқилғисини аҳолига бепулга тарқатиш бўйича кўрсатма берди. Қайд этилишича, бортига 3700 метрик тонна ёқилғи ортилган биринчи кема Керавалапития ҳудудига келади.

Маҳаллий ОАВ хабарларига кўра, 3740 метрик тонна дизел ёқилғиси ортилган иккинчи кема 11 июльда, 3200 метрик тонна ёқилғи бўлган учинчи кема эса ҳудудга 15 июльда етиб келади.

Шри-Ланкадаги намойишлар:

Жорий йилнинг 9 июль куни орол давлатни ҳукуматга қарши кенг кўламли акциялар қамраб олди. Намойишчилар Шри-Ланка ҳукуматининг истеъфога чиқишини талаб қилмоқда. Юзлаб намойишчилар баррикадаларни бузиб ўтиб, президент Готабай Ражапаксанинг расмий қароргоҳи ва идораси жойлашган кампусга киришган.

Ўша пайтда президент кампусни тарк этган, уни хавфсиз жойга олиб кетишган.

Қолаверса, сиёсий партиялар етакчилари Шри-Ланка президенти Готабай Ражапакса ва бош вазир Ранил Викремесингенинг истеъфосини талаб қилишган. Бунга жавобан Викремесинге истеъфога чиқиш ва янги ҳукуматни шакллантиришга тайёрлигини маълум қилган.

Шри-Ланка президенти Готабая Ражапакса ҳам намойишчилар талабларига рози бўлди ва 13 июль куни ўз лавозимини тарк этади.

• Shri-Lanka
• yoqilg‘i