Кеча, 21 январь куни Швецияда, юмшоқ қилиб айтганда, нотинчлик бўлди – у ерда оммавий кўча тартибсизликлари авж олди. Сабаби, Даниядаги ўнг қанот Страм Курс (Қаттиқ чизиқ) партиясини бошқараётган даниялик, швед паспортига эга бўлган, исломга қарши фаол Расмус Палудан бошчилигида амалга оширилган намойишдир.

Ушбу сиёсий спектакл режалаштирилгани жума куни аллақачон маълум эди: Швеция полицияси ўта ўнг сиёсий партия раҳбарига Стокгольмдаги Туркия элчихонаси яқинида Қуръон нусхасини ёқиш учун рухсат беришини айтди. Шундан сўнг расмий Анқарада мамлакат элчиси Стаффан Херстрёмни чақиртиришди. Улар унга тушунтиришди: бу аслида "очиқ-ойдин нафрат билан қилинаётган жиноят”, улар бундай "провокацион ҳаракат"га чидашмоқчи эмаслар.

"Швециянинг ушбу позицияси қабул қилиниши мумкин эмас. Биз бу хатти-ҳаракатга йўл қўйилмаслигини ва муқаддас қадриятларни ҳақорат қилишни "демократик ҳуқуқлар" ниқоби остида ҳимоя қилиб бўлмаслигини маълум қиламиз” - дея қўшимча қилди Туркия ТИВ ва дипломат мамлакатдан чиқариб юборилди.

Бунга жавобан, Швеция Ташқи ишлар вазирлиги исломофобияни қўллаб-қувватламаслигини, бироқ мамлакатда сўз эркинлиги борлигини билдирди. Стокгольмда Қуръонни ёқиш билан боғлиқ акциядан сўнг Анқаранинг баёнотига вазирлик шундай муносабатда бўлди.

“Исломофобик провокациялар даҳшатли. Швецияда кенг қамровли сўз эркинлиги мавжуд, аммо бу Швеция ҳукумати ёки мен ўзим билдирилган эътиқодларни қўллаб-қувватлаймиз, дегани эмас ", деб ёзди Швеция Ташқи ишлар вазирлиги раҳбари Тобиас Биллстрём ўзининг Тwиттер саҳифасида.

Нима учун бундай ишлар қилинаябди?

Қуръоннинг бугунги "ёндирилиши" Стокгольмда шу ҳафта бошида бўлиб ўтган норозиликнинг давомидир. Аввалроқ, курд фаоллари Туркия президенти Ражаб Тоййиб Эрдўған тасвирланган манекенни оёғидан осиб қўйишди. Анқара воқеага кескин муносабат билдирган ва Швецияни “террор ташвиқот маркази” деб атаган ва ҳукуматни Туркияда фаолият юритаётган қуролли курд гуруҳларини қўллаб-қувватлаётганликда айблаган.

Швеция расмийларининг позицияси ноаниқ. Нега улар Анқара билан бунчалик очиқ ва равшан жанжаллашмоқда, уларнинг НАТОга аъзо бўлиш-бўлмаслиги кимнинг қарорига боғлиқ?

• Ислом
• Намойиш
• Швеция