Ўзбекистон Экология вазирлиги раҳбари маслаҳатчиси Расул Кушербаев Россия Ташқи ишлар вазирлиги расмий вакили Мария Захарованининг 6-синф ўқувчисини калтаклаш воқеасидан кейин “расмий тушунтиришлар” талаб қилганига жавоб сифатида уни Ўзбекистонда бўлиши номақбул деб топилган хорижликлар рўйхатига киритишни таклиф қилди. 

“Биз бирор марта ҳам Россия мактабларида бўлаётган ишларга аралашмаганмиз. Чунки бу мутлақ Россиянинг ўз ички иши. 

Шу жиҳатдан Россия Ташқи ишлар вазирлиги вакили Мария Захаровани Тошкентдаги мактаб воқеасига бурнини тиқиб, Ўзбекистоннинг ички ишларига аралашаётгани шунчаки бир муносабат билан ўтиб кетадиган воқеа эмас. 

Афсуски, тилидан заҳар томишдан у ёғига ўтмайдиган Захарованинг бошқа халқ ва мамлакатлар ички ишларига аралашиши биринчи бор эмас.

Қолаверса, яқинда Ўзбекистонни босиб олиш ҳақида айтган россиялик сиёсатчининг ҳаракатларини изоҳлашда ҳам Заҳар хоним Ўзбекистонни камситган эди.

Шу боис, яқинда Сенат қабул қилган қонунга асосан, Захаровани “Ўзбекистонда бўлиши номақбул деб топилган чет эл фуқаролари ва фуқаролиги бўлмаган шахслар рўйхати”га киритишнинг айни вақти. Рўйхатни ундан бошлаш керак. Токи, бу шахс ўзининг ҳақоратомуз, шовинистик баёнотлари жавобсиз қолмаслигини реал ҳис қилсин”, — дея жавоб қайтарди Расул Кушербаев.

Эслатиб ўтамиз, бир неча кун аввал интернет ва ОАВда Тошкентда рус тилидан дарс беришни сўрагани учун калтакланган бола тасвирланган видео тарқалди.

Шу ҳолат бўйича Мария Захарова Россия томони Ўзбекистондан “расмий тушунтиришлар” сўраганини айтган эди.

• Mariya Zaxarova
• Rasul Kusherbayev
• Россия