Қозоғистон президенти Қосим-Жомарт Тўқаев июн ойида бўлиб ўтган референдум якунлари бўйича Конституцияга ўзгартириш ва қўшимчалар киритиш бўйича олтита қонунни имзолади, дея хабар бермоқда давлат раҳбари матбуот хизмати.

Булар Конституциявий суд, Инсон ҳуқуқлари бўйича вакил, Прокуратура тўғрисидаги қонунлар, айрим конституциявий қонунларга, қонун ҳужжатларига ҳамда Маъмурий ҳуқуқбузарликлар тўғрисидаги кодексга ўзгартиш ва қўшимчалар киритишдир.

Қозоғистон Адлия вазирлигида аввалроқ тушунтирилганидек, ҳужжатларда президентнинг маҳаллий ижро этувчи органлар ва Судялар олий кенгашига нисбатан айрим ваколатларини қисқартириш, парламентдаги президентлик квотаси деб аталадиган миқдорни қисқартириш, шунингдек, президентлик даврида маълум чекловларнинг киритилиши кўзда тутилган.

Энди Қозоғистон президенти вилоят, республика аҳамиятига молик шаҳар ва пойтахт ҳокимларини (раҳбарларини) маҳаллий депутатлар розилигидан кейин тайинлаши мумкин бўлади. Сенатдаги “президентлик квотаси” 15 депутатдан 10 депутатга қисқартирилади.

Давлат раҳбарининг сиёсий партияларга аъзо бўлиши тақиқланади, унинг яқин қариндошлари эса квазидавлат секторида (давлатга қарашли корхоналар, шунингдек, шўба, қарам ва бошқа корхоналарда ) сиёсий ва раҳбарлик лавозимларида ишлай олмайди.

Маълумот учун, Қозоғистонда июн бошида Конституцияни ўзгартириш бўйича референдум бўлиб ўтган, ўзгартиришларни сайловчиларнинг 77,18 фоизи қўллаб-қувватлаган. Асосий қонунга киритилган ўзгартиришларга кўра, бир шахс кетма-кет икки мартадан ортиқ давлат раҳбари этиб сайланиши мумкин эмас. Президентлик муддати эса, 7 йиллик этиб белгиланди.

• Қозоғистон
• To'qayev