“Тошшаҳартрансхизмат” матбуот хизматининг маълум қилишича, 7 майдан бошлаб Тошкент шаҳридаги автобусларда кондиционерлар босқичма-босқич ишга туширилмоқда.

Қайд этилишича, совитиш тизимида носозлик мавжуд бўлган автобуслар қатновга чиқарилмайди. Шунингдек, ҳайдовчиларга кондиционерлардан тўғри ва узлуксиз фойдаланиш бўйича тегишли кўрсатмалар берилган.

Тошкент шаҳар транспорт ва йўл-транспорт инфратузилмасини ривожлантириш бош бошқармаси ташқи ҳаво ҳарорати 28 даражадан ошганда автобуслардаги кондиционерлар доимий ишлаши шартлигини билдирган.

Маълум қилинишича, мазкур талаблар устидан назорат кучайтирилган бўлиб, қоидаларга амал қилмаган ташувчиларга нисбатан тегишли чоралар кўрилади.

“Ўзгидромет” прогнозига кўра, 8 май куни Тошкент шаҳрида ҳаво ҳарорати 34–36 даражагача кўтарилиши кутилмоқда.