Тошкент вилояти Янгийўл туманида 41 ёшли эркак 4 яшар қизни зўрлагани маълум бўлди. Тошкент вилояти ИИББ матбуот хизмати ушбу ҳолат юзасидан расмий муносабат билдирди.

“Жорий йилнинг 02 октябрь куни Янгийўл шаҳарида яшовчи фуқаро шаҳар ИИБ бошлиғи номига ариза билан мурожаат қилиб, унда вояга етмаган 2020 йилда туғилган И.М.га нисбатан номаълум шахс ғайритабиий усулда зўрлик ишлатганлиги ҳақида маълум қилиб, унга нисбатан қонуний чора кўришликни сўраган.

Ҳолат юзасидан олиб борилган терговга қадар текширув ҳаракатлари давомида, гумонланувчи шахс 1983 йилда туғилган фуқаро Б.Д. экани аниқланган.

Шунингдек, ўрганишлар жараёнида гумонланувчи Б.Д.нинг ёнида 15 грамм гиёҳвандлик моддаси борлиги аниқланиб, унинг Янгийўл тумани ҳудудида жойлашган яшаш хонадони холислар иштирокида текширилган.

Натижада хонадон ошхонасидан 20 дан ортиқ елим идишларда, майдаланган ва қуруқ ҳолдаги “Марихуана” гиёҳвандлик моддалари борлиги аниқланиб, процессуал тартибда ҳужжатлаштирилиб олинган.

Ҳолат юзасидан Ўзбекистон Республикаси ЖКнинг 119-моддаси 4-қисми ва 25/273-моддаси 5-қисми билан жиноят иши қўзғатилиб, фуқаро Б.Д. процессуал тартибида ушланган.

Жиноят иши бўйича дастлабки тергов ҳаракатлари олиб борилмоқда, натижаси бўйича қўшимча равишда ахборот берилишини таъминланади”.

Кейинчалик маълум бўлишича, айбланувчи 2021 йилдан буён руҳий касалликлар шифохонасида рўйхатда турган.

• Жиноят
• Ўзбекистон
• Toshkent viloyati