Тошкентда узоқ муддатга ноҳақ қамалиб, сўнг оқланган фуқаро 1 миллиард сўм маънавий зарар талаб қилди. Бу ҳақда Олий суд матбуот котиби Азиз Обидов хабар қилди.

Маълум қилинишича, 42 ёшли “Садаф” МЧЖ раҳбари, тадбиркор Дилшод Мингбоев 2011 йилда Жиноят кодексининг 182-моддаси, яъни божхона тўғрисидаги қонунчиликни бузишда айбланиб, 8 йилга озодликдан маҳрум қилинган.

У жазо муддатининг 5 йилини ўтаб бўлганидан кейин, Олий суднинг ажрими билан ноҳақ қамалгани маълум бўлган ва озодликка чиқарилган. Тадбиркор фуқаролик судига мурожаат қилиб, 1 миллиард сўм маънавий зарар тўлаб берилишини сўраган.

“Шу 5 йил ичида қанча қийинчиликлар кўрдик, онам қанча қийналди, шунинг орқасидан касал орттирди. Умр йўлдошим, онам, мен, қанча қийинчиликларни бошдан ўтказдик”, – деган у.

Учтепа туман судида кўриб чиқилган ишда Тошкент вилояти ҳокимлиги ҳузуридаги жисмоний ва юридик шахсларга етказилган мулкий зарарларни компенсация қилиш бўйича ҳудудий мақсадли жамғармадан даъвогар фойдасига 300 миллион сўм ундирилиши ҳақида қарор чиқарилган.

• Суд
• Тошкент