Эрон Ислом Республикасининг ҳалок бўлган олий раҳнамоси Оятуллоҳ Али Хоманаийнинг ўғли — Мужтабо Хоманаий мамлакатнинг янги раҳбари этиб сайланди. Бу ҳақда Германиянинг Deutsche Welle (ДW) нашри Эрон ҳукумати таркибидаги ўз манбаларига таяниб хабар берди.

DW манбаларига кўра, Мужтабо Хоманаийни сайлаш тўғрисидаги қарор 88 нафар нуфузли шиа уламоларидан иборат кенгаш томонидан қабул қилинган. Таъкидланишича, ушбу тайинлов Ислом инқилоби муҳофизлари корпуси (ИИМК)нинг бевосита босими остида амалга оширилган.

Ҳозирча Эрон расмийлари ва давлат ОАВ ушбу маълумотни расман тасдиқламаган. Айни пайтда, мамлакатни вақтинча Масъуд Пезешкиён, суд ҳокимияти раҳбари Ғулом Ҳусайн Муҳсиний-Эжей ва васийлик кенгаши аъзоси Оятуллоҳ Алиризо Араафийдан иборат уч кишилик кенгаш бошқармоқда.

Эрон қонунчилигига кўра, мамлакатнинг диний раҳбари умрбод муддатга “Экспертлар кенгаши” томонидан тайинланади. Ислом ҳуқуқи бўйича 88 нафар мутахассисдан иборат ушбу орган ҳар саккиз йилда бир марта фуқаролар томонидан сайланади. Охирги сайловлар 2024 йилда бўлиб ўтганди.

Хоманаийнинг ўғли Мужтабо ҳам айрим гуруҳлар томонидан эҳтимолий ворис сифатида тилга олинган бўлса-да, Хоманаий ўзи олий раҳнамо лавозими мерос тариқасида ўтишини истамаслигини билдирган.

• Eron
• Rahbarlik
• Тайинлов