Кеча, 12 октябрь куни Олий ва ўрта махсус таълим вазири Абдуқодир Тошқулов олий таълим муассасаларида ўқув жараёнини кредит-модул тизими асосида ташкил қилишни такомиллаштириш бўйича ишчи гуруҳ, ўқув ишлари бўйича проректор ва тегишли масъуллар иштирокида видеоселектор йиғилиши ўтказди.

Қайд этилишича, вазир дастлаб сўнгги вақтларда ижтимоий тармоқлар орқали ҳалигача айрим олий таълим муассасаларида ўқишини кўчириш билан боғлиқ масалалар кўтарилаётгани, бунда талабалар ва яқинларининг эътирозлари кенг жамоатчилик муҳокамасига сабаб бўлаётганини танқид қилган.

“Ўзбекистон-Финляндия педагогика институти юзасидан эълон қилинган мурожаатга муносабат билдирилиб, у ерда маънавий муҳит талаб даражасида эмаслиги, гуруҳбозлик каби иллат илдиз отиб, бу ўз навбатида талабалар таълим олишига ҳам таъсир кўрсатаётганини кескин қоралади. Вазир шу жойнинг ўзидаёқ хизмат вазифасига масъулият билан ёндашмаганлиги, муассасада таълим жараёни ва ижтимоий муҳитни тўғри ташкил этмаганлиги учун институт раҳбарини вазифасидан озод этиш бўйича масъулларга топшириқ берилди”, – дейилади хабарда.

Бундан ташқари, айрим университетларда ҳали ҳам уруғ-аймоқчилик, қариндошчилик ҳолатлари сақланиб қолаётгани, талабалар тақдирига лоқайд, ёшлар тарбиясига масъулияциз раҳбарлар учраётгани тилга олинган.

Шундан сўнг, талабалар билимини назорат қилиш ва баҳолаш тизими, унинг ўртача қийматини ҳисоблаш мавзусида тақдимот намойиш этилиб, кредит-модул ҳамда олий таълим жараёнларини бошқариш ахборот тизимида кузатилаётган камчиликлар муҳокама қилинган.

Шунингдек, ҳалигача айрим профессор-ўқитувчилар эскича метод асосида талабаларга таълим бераётгани, уларнинг янги тизимга мослаша олмаётгани ҳам таълим сифатига таъсир кўрсатаётгани қайд этилиб, улар учун талабанинг мустақил таълим олишга ўргатиш, баҳолаш тизими борасидаги компетенсияларини ошириш бўйича семинар-тренинглар ташкил этиш вазифаси берилган.

“Ҳудудлардаги олий таълим муассасаларига борганимда ахборот-ресурс марказларига алоҳида эътибор қаратаман, шунда кўплаб талабалар қўлида асосан бадиий адабиётларни кўраман. Аслида талаба ўз мутахассислиги бўйича зарур манбаларни ўқиши керак. Афсуски, улар керакли ўқув қўлланмалар йўқлигидан бошқа адабиёт ўқишга мажбур бўлмоқда”, – деди вазир.

Бунга сабаб сифатида олий таълим муассасаси зарур ўқув адабиётларни тендер асосида харид қилиши, лекин тендердаги адабиётлар ичида у излаган қўлланмалар йўқлиги таъкидланган.

Юқоридагилардан келиб чиқиб, масъулларга икки ҳафта муддатда ўқув жараёнларининг барча жабҳаларини пухта ўрганган ҳолда таҳлилий маълумот киритиш юзасидан кўрсатма берилган.

• ОТМ
• Тошқулов
• Университет
• Вазирлик