Анқара Ғарб давлатларининг Россия ва унинг президенти Владимир Путинга қарши санкциялар жорий этишини қўллаб-қувватламайди. Бу ҳақда Туркия президенти Ражаб Тоййиб Эрдўғон Сивас вилоятидаги митингда сўзлаган нутқида айтиб ўтди.

Эрдўғоннинг баёноти давлат раҳбари лавозимига номзод ва Республика Халқ партияси (РХП) етакчиси Камол Қиличдорўғлунинг ҳокимиятга келса, Москвага нисбатан қаттиқ санкциялар қўллашга ваъда берган баёнотига жавобан билдирилди.

Туркия раҳбари, шунингдек, россиялик мавқедоши Владимир Путин билан ижобий алоқаларни давом эттираётганини таъкидлади.

“Жаноб Камол (Қиличдорўғлу) жаноб Путин билан яхши муносабатда бўлганимдан хурсанд эмас. У: “Ғарбнинг буйруғига бўйсунаман, Путинга санкция қўяман”, дейди. Сиз сиёсатни мутлақо тушунмайсиз, жаноб Камол, таътилга чиқинг”, – деди Эрдўғон.

Унинг қўшимча қилишича, ушбу омил туфайли Туркия Россия ва Украина ўртасида воситачи бўла олади.

Бундан ташқари, Туркиянинг амалдаги раҳбари Анқаранинг Россия, АҚШ ва бошқа Ғарб давлатлари, шунингдек, Хитойга нисбатан сиёсатида ижобий муносабатни сақлаш тарафдори эканини таъкидлади.

• Эрдоған
• Путин
• Россия
• Санкция
• Туркия