Бугун, 28 август куни Украина қўшинлари мамлакатнинг жанубий-шарқида жойлашган Работино қишлоғини Россия аскарларидан озод қилди. Украина қўшинлари Россиянинг жанубдаги мустаҳкам мудофаа чизиғини ёриб ўтган. Шу тариқа украинлар қарши ҳужумда олдинга тезроқ силжишлари мумкин.

Работинонинг Россия аскарларидан қайтариб олинганини Украина Мудофаа вазири ўринбосари Анна Василевна Малиар ҳам тасдиқлади.

Аҳоли пункти Запороже вилоятидаги Орихов шаҳридан 10 км жанубда, Россия томонидан босиб олинган автомобил ва темир йўл тармоғи маркази – Токмак шаҳрига олиб борадиган йўлда жойлашган. Украина Мудофаа вазири ўринбосари Малиарнинг билдиришича, қўшин мамлакат жануби-шарқидаги Мала Токмачка аҳоли пункти томон ҳаракатланмоқда.

Работинонинг қайтариб олингани Россия томонидан тасдиқланмади. Август ойида НАТОнинг юқори мартабали ҳарбий раҳбарлари ва Украина генераллари ўртасида мамлакатнинг ҳарбий стратегиясини қайта тиклаш бўйича учрашув ўтказилгани Россия томонидан тасдиқланган эди.

Шунингдек, Украина қўшинлари шарқдан ҳам қарши ҳужумга ўтяпти. Бироқ шарқ томонда украинларнинг олдинга силжиши жуда секин кечмоқда. Сабаби, улар россияликларнинг мина ва хандақларига дуч келишяпти.

Мудофаа вазири ўринбосарининг билдиришича, бир неча ойлик шиддатли жанглардан сўнг деярли вайронага айланган Бахмутдан жануб томонга силжиш ҳам давом этади. Қолаверса, Бахмутнинг 1 кв.км майдони руслардан қайтариб олинган.

• Жаҳон
• Россия
• Украина