Якшанба куни Фаластиннинг ХАМАС гуруҳи сўнгги ойларда биринчи марта Исроил марказидаги Тель-Авив ҳудудига ракета ҳужумини уюштирди. Кейинроқ Исроил армияси Рафаҳдаги объектга зарба берди.

Ғазонинг ХАМАС назоратидаги Соғлиқни сақлаш вазирлиги душанба куни кечқурун Рафаҳга берилган зарба оқибатида камида 35 киши ҳалок бўлганини ва ўнлаб одамларнинг яраланганини маълум қилди.

Исроил мудофаа кучлари шаҳардаги ХАМАС лагерига ҳаво ҳужуми уюштирганини тан олди. Ҳамда тинч аҳоли вакилларининг жароҳатлангани ҳақидаги хабарларни тасдиқлади.

Исроил махфий разведкаси: “Зарба халқаро қонунларга мувофиқ, аниқ ўқ-дорилардан фойдаланган ҳолда ва ХАМАС ҳудудни эксплуатация қилаётганини кўрсатувчи аниқ разведка маълумотларига асосланган ҳолда қонуний нишонларга қарши амалга оширилганини”, маълум қилган.

Аввалроқ Рафаҳдан Тель-Авивга камида саккизта ракета учирилган, бир қанча ракета тутиб олинган, дея хабар берди Исроил ҳарбийлари.

Ҳужум Халқаро жиноий суд бош прокурори Карим Аҳмад Хон Исроил бош вазири Бенямин Нетаняху ва мудофаа вазири Йоав Галлантни ҳибсга олиш учун ордер сўраган ҳамда Европанинг учта давлати Фаластин ҳудудларини суверен давлат сифатида тан олиш ниятини эълон қилган кундан сал ўтиб содир бўлди.

БМТ судининг ҳужумни тўхтатиш талабига қарамай, Исроил Рафаҳга янги зарбалар берди.

ХАМАСнинг ҳужум ҳақидаги ҳисоботига қўшилган суратларда ракеталарнинг бир қисми шарқий Рафаҳ шаҳридан, 18 кундан бери Исроил ҳарбийлари назорати остида бўлган чегара пунктига жуда яқин жойда отилгани кўрсатилган. Исроиллик қурбонлар бўлгани ҳақида маълумотлар йўқ.

• Isroil