“Хитой-Қирғизистон-Ўзбекистон” темирйўли қурилиши 2024 йил октябрь ойида бошланиши режалаштирилган. Бу ҳақда Қирғиз темир йўли капитал қурилиш бошқармаси бошлиғи Рисқулбек Жумабоев маълум қилди.

У амалга оширилаётган халқаро лойиҳа, шунингдек, “Балиқчи — Қўчқор — Қора-Кече — Макмал” темирйўли мамлакатнинг асосий транспорт артерияларига айланишини таъкидлади.

“Хитой-Қирғизистон-Ўзбекистон” темирйўли Транс-Евросиё транспорт йўлаги жанубий қисмининг тармоқларидан бирига айланади.

Келишувга мувофиқ, режалаштирилган темирйўл “Қашғар – Торугарт – Макмал – Жалолобод – Андижон” йўналиши бўйлаб ўтади. Унинг йиллик юк ташиш ҳажми 15 млн тоннага етиши, истеъмолчиларга товарларни етказиб бериш муддати етти кунга қисқариши кутилмоқда.

Қирғизистон “Хитой-Қирғизистон-Ўзбекистон” темирйўли қурилиши учун Хитой банкларидан кредит олиш ниятидалиги маълум қилинди . Эслатиб ўтамиз, мазкур лойиҳанинг умумий қиймати 4 миллиард 700 миллион долларга баҳоланган.

• Қирғизистон
• Хитой