“Сити” бу ўйинга Англия Кубоги 4-босқичида “Лейтон” устидан қозонилган ғалаба билан келаётган бўлса, “Реал” Ла Лига доирасида Мадриднинг бошқа бир жамоаси “Атлетико” билан куч синашиб, дуранг қайд этган ҳолда етиб келди.

Ушбу беллашувга қадар иккала жамоада ҳам жиддий йўқотишлар бор эди. Бироқ, “шаҳарликлар” сафидаги бир қатор футболчилар сафга қайтганлиги маълум бўлди. Улардан Жон Стоунз ва Рубен Диаш жароҳатидан тўлиқ фориғ бўлган. “Қаймоқранглилар”да эса йўқотишлар устига йўқотиш. Сўнги хабарларга кўра, Манчестердаги ўйин учун қайдномага киритилган ҳимоячи Лукас Васкес ҳам мазкур беллашувни жароҳат сабаб ўтказиб юбориши ойдинлашди.

Жамоалар таркибидаги умумий йўқотишларга назар солсак.

 “Реал Мадрид”: Лукас Васкес, Давид Алаба, Эдер Милитао, Антонио Рюдигер, Дани Карвахал. Рўйхатда санаб ўтилган футболчиларнинг барчаси ҳимоя вакиллари ҳисобланади.

“Манчестер Сити”: Натан Аке, Родри, Жереми Доку, Нико Гонсалес.

Жамоалар ўртасидаги ўзаро ўйинлар жами 14 тани ташкил қилади. Шундан 4 ўйинда “Манчестер Сити”нинг ғалабаси қайд этилган, “Реал” ҳисобида эса 3 та ғалаба мавжуд ва яна 5 та баҳсда кучлар тенг келган.

Бугуннинг асосий ўйини ва сўнги йилларда ҳақиқий драмага айланаётганлиги учун ушбу баҳсни бутун дунё футбол мухлислари интиқлик билан кутаётган бўлса, ўзбек футболи мухлислари учун бошқа бир жиҳат ўйинни томоша қилиш учун катта қизиқиш уйғотмоқда. Ҳа, “Сити” сафида дебют мавсумини ўтказаётган ва жамоанинг сўнгги ўйинида гол уришга эришган ўзбекистонлик ҳимоячи Абдуқодир Ҳусановнинг ҳам бугун тарихий баҳсда майдонга тушиши кутилмоқда.

Эслатиб ўтамиз, ушбу баҳс 12 февралга ўтар кечаси Тошкент вақти билан соат 01:00 да старт олади.

Маълумот учун: Европа чемпионлар лигасида “Ливерпул”, “Барселона”, “Арсенал”, “Интер”, “Атлетико”, “Баер”, “Лилл” ва “Астон Вилла” клублари 1/8 финал босқичига тўғридан-тўғри йўл олган.

• Abduqodir Husanov
• Футбол
• Manchester Siti
• Real
• ЕЧЛ