31°
Кечаси 18°
Кеча тунда футбол мухлислари ажойиб драматик учрашув гувоҳи бўлишди. Чемпионлар Лигасида “Реал Мадрид” ва “Манчестер Сити” ўртасидаги баҳс чиндан ҳам классик тўқнашувга айланди. Ўйин давомида майдонда нафақат техник маҳорат, балки бош мураббийлар тактик жанги ҳам кетди.
“Шаҳарликлар” ўйинни кучли прессинг ва аниқ узатмалар билан бошлади. Бу тактик ўйланма 19-дақиқага келиб ўз самарасини берди. Эрлинг Ҳоланд аниқ зарбаси билан ҳисобни очди, 1:0. Гол “Ман Сити”га нафақат ҳисобда, балки руҳий жиҳатдан ҳам муҳим устунлик берди.
Мадрид жамоаси биринчи бўлимда ўз ўйинини топишда анча қийналди, дарвоза томон кўплаб зарбалар берилган бўлса-да, ҳисоб ўзгармади. Иккинчи таймда Анчелотти тактикани бироз ўзгартирди. “Реал” ҳимояни кучайтириб, тезкор қарши ҳужумларга таянишни бошлади. Ниҳоят, 59-дақиқада Дани Себалоснинг ажойиб узатмасидан сўнг Мбаппе ҳисобни тенглаштирди. Шунга қарамасдан мезбонлар бир неча ўзгаришлар қилиб, олдинга боришда давом этаверди. Шундай ҳужумларнинг бирида Фил Фоденга бўлган қўполлик учун учрашув бош ҳаками Турпен кўплаб мухлислар наздида баҳси вазият учун Куртуа дарвозаси томон пенальти белгилади. 78-дақиқада Ҳоланд пенальтидан аниқ зарба йўллаб, яна жамоасини олдинга олиб чиқди. Аммо, “қироллик клуби” ҳар доимгидек сўнгги дақиқаларгача олдинга бораверди. Ўйин асосий вақти якунланишига 5 дақиқа вақт қолган ва “Ман Сити” ғалабага жуда яқин эди, аммо мадридликлар ҳеч қачон таслим бўлмасликларини яна бир бор исботлашди. Родриго ўрнига майдонга тушган Браҳим Диаз 86-дақиқада, илк ҳужумиданоқ гол урди ва ҳисобни 2-2 кўринишига келтирди. Барчанинг фикрича ўйин дуранг билан якунланадигандек эди. Аммо, “камбекшунос” “Реал Мадрид” бунга кўнмади учрашув асосий вақтига қўшиб берилган 3 дақиқанинг иккинчиси ўтиб бораётган бир вақтда англиялик яримҳимоячи Жуд Белленгем ўйинга нуқта қўйди. Умумий ҳисоб 2:3 “Реал” фойдасига.
Маълумот учун, ушбу жамоалар ўртасидаги жавоб ўйини “Бернабеу”да 20 февралга ўтар кечаси Тошкент вақти билан соат 01:00 да бўлиб ўтади. Чемпионлар Лигаси бу йил ҳам бизни кутилмаган воқеалар билан ҳайратга солишда давом этади!
Шунингдек, тунда ЕЧЛ доирасида яна 3 та учрашув бўлиб ўтди. “Ювентус” ўз уйида “ПСВ” устидан 2:1 ҳисобидаги иродали ғалабага эришган бўлса, “ПСЖ” Дембеленинг дубли эвазига “Брест”ни йирик 3:0 кўринишида енгди. Португалияда “Спортинг” меҳмони бўлган “Боруссия Дортмунд” ҳам 0:3 ҳисобида зафар қучди.
Тайёрлади: Азимжон Шодмонов
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
