Ёзнинг иссиқ кунларида музқаймоқ ва салқин ичимликларга нисбатан талаб жуда ошиб кетади. Қанчалик совуқ бўлмасин музқаймоқ ҳам жуда тез эриб кетади. Бу вазиятда қандай йўл тутган маъқул? Албатта, сиз билан ҳозир милкшейк (сутли коктейл) тайёрлашни ўрганамиз. Гарчи унга мева ва музқаймоқ қўшилса-да, биз уни мевали сут ёки эриган музқаймоқ дея олмаймиз. Бир стаканда иккита лаззатни бирлаштирган мазали ичимлик бу юқорида айтганимиздек – милкшейк!

Иссиқ кунда тетиклик бахш этадиган, қишда эса ширин таъми билан қувонч қўшадиган милкшейк тайёрлаш ёш болалар учун кунлик рациондан жой олиши жуда фойдали. Бу ичимлик учун алоҳида қурилма сотиб олиш ҳам шарт эмас. Блендер ёки чоппернинг ўзи етарли бўлади. Ҳозир сиз билан 3 хил сутли коктейл тайёрлашни бўлишамиз, ўйлаймизки, бу ичимлик дастурхонингиз кўркига кўрк қўшиб тура олади.

Шоколадли милкшейк

Шоколадли милкшейк учун керакли маҳсулотлар:
совуқ сут;
шоколадли музқаймоқ;
3-4 дона кубик шаклидаги муз;
кўпиртирилган қаймоқ (ўз хоҳишингизга кўра).

Энг аввал сут ва музқаймоқни блендерга солинг ва аралаштиринг.

Агар хоҳласангиз стаканни безатиш учун шоколад қайласидан фойдаланамиз. Устига безак учун кўпиртирилган қаймоқ соламиз ва шоколад бўлакчаларини жойлаймиз.

Бананли милкшейк

Болалар бу милкшейкни жуда яхши кўришади. Нима учун бу ичимликни тайёрлаш жуда осон бўлса ҳам биз уни сотиб олишимиз керак? Мен бу ерда музқаймоқли милкшейкнинг тарифини келтириб ўтаман.

Бананли милкшейк учун керакли ингредиентлар:

2 та банан;
2 стакандан камроқ совуқ сут (тахминан 1,5 стакан);
4 ошқошиқ ванилли музқаймоқ;
муз (ихтиёрий).

Бананли милкшейкни тайёрлаш учун аввало бананни пўчоғидан тозалаймиз ва 2-3 бўлакка бўламиз.

Сўнгра банан, сут ва музқаймоқни блендерга соламиз. Блендерни аввал паст даражада ишга туширамиз ва секин юқорилатамиз, шунда барча маҳсулотлар парчаланади ва тўлиқ аралашади.

Ниҳоят, ихтиёрий муз бўлакларини қўшинг! Ушбу сутли коктейлни дарҳол, совуқ ҳолича истеъмол қилиш мумкин. Ёқимли иштаҳа.

Қулупнайли милкшейк

Баҳор ойининг энг севимли меваси – қулупнай қўшилган милкшейк тайёрлаш учун керакли маҳсулотлар:

қулупнай 10 дона;
сут – 2 стакан;
4 ошқошиқ музқаймоқ;
шакар;
муз (ихтиёрий).

Қулупнай, сут, музқаймоқ, шакарни блендерга соламиз ва аралаштирамиз. Ушбу сутли коктейлга шакар солишдан асосий мақсад, қулупнай бироз нордон бўлганлиги учун унга ширин таъм бериш жуда муҳим. Тайёр суюқликка ихтиёрингизга кўра муз солинг ва шу ҳолатда ичишингиз мумкин. Ёқимли иштаҳа.

Бир нарсани унутманг, ҳар қандай маҳсулотни меъёридан ортиқ истеъмол қилиш унинг фойдали хусусиятларини камайтириб юбориши табиий. Шу сабабдан ҳам саломатлигингизни асранг.

• Yoz fasli
• саломатлик