Бугун, 4-март куни Украина президенти Володимир Зеленский видеомурожаат йўллаб, Россия қўшинларини Европадаги энг йирик – “Запорожье” атом электр стансиясига ҳужум қилганликда айблади. Бу ҳақда “Медуза” нашри хабар берди.
“Биз Украина ва Европа тарихига нуқта қўйиши мумкин бўлган кечани бошдан ўтказдик. Россия қўшинлари “Запорожье” атом стансиясига ҳужум қилди. Россиялик танкчилар тўғридан тўғри кўрсатма асосида зарба берди.
Рус халқи мен сизларга мурожаат қилмоқчиман! Қандай қилиб бундай бўлиши мумкин? Биз ахир 1986-йилда Чернобил фожиаси оқибатлари билан бирга курашгандик-ку! Портлаш оқибатида сочилиб кетган ёнаётган графит эсингиздадир. Вайрон бўлган энергоблок узра нурланишларни эслашингиз керак. Припят ва 30 километр зонадан эвакуацияни эсланг. Қандай қилиб буни унутиш мумкин?
Унутмаган бўлсангиз, жим турманг. Кўчага чиқинг ва яшашни, радиоактив нурлардан зарарланмаган Ерда яшашни исташингизни ҳукуматингизга айтинг. Радиация Россия қаердалигини билмайди. Радиация мамлакатингиз чегарасини билмайди”, – дейди Украина раҳбари.
Қайд этиш мумкин, АЭС ҳудуди ўққа тутилиши натижасида ўқув мажмуаси биноларидан бири ёнган. Ёнғин беш қаватли бинонинг 3, 4, 5 қаватларини қамраб олган.
“Агар портласа, у Чернобилдан 10 баравар катта бўлади. Россия дарҳол ўт очишни тўхтатиши, ўт ўчирувчиларга рухсат бериши, хавфсизлик зонасини ташкил қилиши керак", – деб ёзиб қолдирган Украина ТИВ раҳбари.
Запороже АЭС директор вазифасини бажарувчи Игор Мурашов эса ҳолат ҳақида баёнот бериб, АЭСда ядро хавфсизлиги бузилгани, ҳужум оқибатида реакторлар хавф остида қолганини маълум қилган.
АЭС ҳудудини ўққа тутиш тўхтаганидан сўнг ёнғинни ўчиришга 40 киши ва 10 та техника жалб қилинган.
Украина президенти эса Запороже АЭСдаги вазиятни жаҳон етакчилари – АҚШ президенти Жо Байден, Германия канслери Олаф Шолс, Европа кенгаши раҳбари Шарл Мишел, Буюк Британия бош вазири Борис Жонсон, Полша президенти Анджей Дуда, МАГАТЕ раҳбари Рафаел Гросси ва бошқа давлатлар билан муҳокама қилди.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!