Toshkent viloyati Bojxona qo‘mitalari va Davlat xavfsizlik xizmati (DXX) bilan hamkorlikda o‘tkazilgan keng qamrovli maxsus operatsiya davomida Tojikistondan kontrabanda yo‘li bilan olib kirilgan 26,8 kilogrammdan ortiq giyohvand modda musodara qilindi.

Dastlab Tojikiston va O‘zbekiston chegarasida noqonuniy tarzda chegarani kesib o‘tgan 39 yoshli Tojikiston fuqarosi qo‘lga olingan. Uning sumkasi ko‘zdan kechirilganda, 15 ta o‘ramda qadoqlangan 14 kg 584 gramm gashish aniqlanib, musodara qilingan.

Keyingi tezkor harakatlar natijasida giyohvand moddaning buyurtmachisi aniqlanib, Farg‘ona viloyatining Toshloq tumanida 56 yoshli erkak ushbu modda yetkazib berilayotganda qo‘lga olingan. Uning jinoyatga aloqadorligini tasdiqlovchi dalillar ham topiladi.

Bundan tashqari, Toshkent viloyatining Bekobod tumanida 33 yoshli erkak Tojikistondan kontrabanda yo‘li bilan olib kirilgan 9 kg 467 gramm opiyni sotmoqchi bo‘lganida qo‘lga olindi. Dastlabki tergov ma’lumotlariga ko‘ra, ushbu opiyni Tojikistondan Surxondaryo viloyatiga tojikistonlik kuryer olib kelgan, so‘ngra uni Denov tumanida yashovchi 30 yoshli erkak qabul qilib olib, Toshkent viloyatiga yetkazgan. U ham qo‘lga olingan.

Maxsus operatsiya davomida Qo‘qon shahrida Lacetti rusumli avtomobil to‘xtatilib, uning yo‘lovchisi — 1967-yilda tug‘ilgan erkak tanasiga yashirgan 1 kg 759 gramm gashish aniqlanib, musodara qilingan.

O‘tkazilgan tadbirlar davomida Tojikistondan jami 26 kg 805 gramm kontrabanda yo‘li bilan olib kirilgan giyohvand moddalar musodara qilingan.

Qo‘lga olingan shaxslarga nisbatan O‘zbekiston Respublikasi Jinoyat kodeksining tegishli moddalari bo‘yicha jinoyat ishlari qo‘zg‘atilib, tergov harakatlari olib borilmoqda.

• DXX
• Giyohvandlik
• Jinoyat
• O‘zbekiston
• Tojikiston