AQSh Qatarga Aydaxo shtatidagi Mauntin-Xom harbiy-havo bazasida o‘zining F-15 qiruvchilari va uchuvchilarini tayyorlash uchun aviabaza inshooti qurishga ruxsat bergan. Bu haqda kecha, 10-oktyabr kuni o‘z manbalariga tayanib, Axios nashri xabar berdi. Nashr ma’lumotiga ko‘ra, ushbu kelishuv bir necha yil davomida ishlab chiqilgan bo‘lib, uning muhokamasi sobiq AQSh prezidenti Jo Bayden ma’muriyati davridayoq boshlangan. Qatar tomonidan quriladigan inshoot AQSh harbiy bazasi hududida joylashadi va AQSh yurisdiksiyasiga bo‘ysunadi.

Axios'ning yozishicha, kelishuvning o‘ziga xos jihati shundaki, Qatar yangi harbiy-havo obyektini noldan boshlab quradi.

“Mamlakatning tekis cho‘l relyefi sababli Qatarning uchuvchilarni tayyorlash imkoniyatlari cheklangan. Shu bois, turli tabiiy sharoitlarda va ob-havoda mashg‘ulot o‘tkazish istagi AQSh hududida baza qurish g‘oyasini yuzaga keltirgan”, – deyiladi xabarda.

• AQSh
• Hamkorlik
• Qatar