Nyu-York tovar birjasi (COMEX) ma’lumotlariga ko‘ra, 21-oktyabr savdolarida oltin narxi 6 foizga pasayib, bir troya unsiyasi uchun 4100 dollarni tashkil etdi. “Bu 2013-yildan buyon kuzatilgan eng katta bir kunlik pasayishdir”, deb ma’lumot bermoqda RBK nashri.

Shuningdek, kumush narxi ham arzonlashdi, “Newmont” kabi yirik kon kompaniyalari aksiyalari keskin tushdi. Bloomberg’ga ko‘ra, bu holat asosan investorlarning foyda olish maqsadida oltin sotishi bilan bog‘liq.

Analitiklar fikricha, AQSh dollarining so‘nggi haftalardagi mustahkamlanishi ham oltin narxiga bosim o‘tkazgan.

“MKS Pamp” kompaniyasi tahlilchisi Nikki Shilsning ta’kidlashicha, narxlar haddan tashqari tez o‘sgani vaziyatni murakkablashtirgan: “Oltin olti hafta ichida 1000 dollarga qimmatladi — bu ortiqcha xarid holatini ko‘rsatadi, biz hozir “stratosfera” bosqichida turibmiz”, – deydi u.

Eslatib o‘tamiz, 20-oktyabrda oltin narxi tarixda ilk bor bir unsiya uchun 4398 dollargacha ko‘tarilgan edi.

• Narx-navo
• Oltin