Oq uy AQSh va Rossiya prezidentlarining ikkinchi uchrashuviga tayyorgarlikni to‘xtatdi. Avvalroq, Vladimir Putin bilan sammit yaqin ikki hafta ichida Budapeshtda o‘tkazilishi mumkinligini aytgan Donald Trampning so‘zlariga ko‘ra, u “foydasiz uchrashuv”ni istamaydi.

AQSh davlat kotibi Marko Rubio va Rossiya tashqi ishlar vaziri Sergey Lavrovning prezidentlar muzokaralaridan bir necha kun oldin o‘tkazilishi rejalashtirilgan uchrashuvi ham amalga oshmaydi. Oq uyning ta’kidlashicha, Rubio va Lavrov 20-oktyabr kuni “samarali telefon suhbati” o‘tkazgan, biroq yuzma-yuz uchrashishdan bosh tortgan, chunki bunga “zarurat yo‘q”.

Putin bilan telefon orqali muloqotdan so‘ng uning fikrini nima o‘zgartirgani va nima uchun Tramp Budapeshtdagi muzokaralar vaqtni behuda sarflash bo‘lishini o‘ylayotgani haqidagi savolga u shunday javob berdi: “Men bunday bo‘lishini aytmaganman va bilasizmi, nima bo‘lishini hech qachon bilmaysiz. Ammo bu frontda, Ukraina va Rossiya urushida ko‘plab voqealar sodir bo‘lmoqda va keyingi ikki kun ichida biz nima qilayotganimiz haqida sizga xabar beramiz”.

Ma’lumot uchun, Amerika prezidenti 17-oktyabr kuni Oq uyda Ukraina prezidenti Vladimir Zelenskiy bilan uchrashuvi yakunlari bo‘yicha frontni “muzlatish”ni taklif qilgandi. Zelenskiy Yevropa davlatlari yetakchilari bilan birgalikda tashabbusni qo‘llab-quvvatlagan.

• AQSh
• Putin
• Rossiya
• Tramp
• Ukraina
• Zelenskiy