Eron oliy yetakchisi Ali Xomanaiy Rossiya rasmiylari bilan vaziyat yana-da keskinlashgan taqdirda mamlakatdan favqulodda evakuatsiya qilish imkoniyati bo‘yicha muzokaralar olib bormoqda. Bu haqda Iran International telekanali o‘z manbalariga tayanib xabar berdi.

Telekanal ma’lumotlariga ko‘ra, Xomanaiy atrofidagi eng muhim shaxslardan biri bo‘lgan Ali Asg‘ar Hedjazi allaqachon Rossiyaning yuqori martabali vakilidan kafolat olgan. Agar Eronda keskinlik kuchaysa, Moskva unga va uning oilasiga mamlakatdan chiqib ketish uchun xavfsiz yo‘lak ta’minlab beradi.

The Times xabariga ko‘ra, Xomanaiy 20 nafargacha eng yaqin yordamchilari va oila a’zolari bilan birga mamlakatni tark etishi mumkin.

Yaqin Sharqdagi diplomatik manba Iran Internationalga ma’lum qilishicha, Isroilning Mashhadga bergan aviazarbası Eron oliy yetakchisiga mamlakatning hech bir joyi xavfsiz emasligi haqida ogohlantirish bo‘lgan. Ta’kidlanishicha, Xomanaiy iyun oyida Isroil bilan bo‘lgan 12 kunlik urushdan keyin “ruhiy va jismoniy jihatdan ancha zaiflashgan”.

Telekanal versiyasiga ko‘ra, hozirda Xomanaiy go‘yoki Tehron shimolida joylashgan bunkerdа yashirinmoqda.

Isroil bosh vaziri Binyamin Netanyaxu o‘tgan yil 14-iyun kuni video murojaatida Eronning oliy rahbarlari “allaqachon chamadonlarini yig‘ayotganini” aytgan edi.

• Eron
• Isroil
• Moskva