O‘zbekistonda havo ifloslanishini kuchaytirgan harorat inversiyasi 16—17-yanvarga qadar saqlanishi kutilmoqda. Bu haqda Ekologiya va iqlim o‘zgarishi milliy qo‘mitasi xabar berdi.

So‘nggi kunlarda mamlakatda harorat inversiyasi bilan bog‘liq noqulay meteorologik sharoitlar oqibatida havo sifatining pasayishi kuzatilmoqda. Ekologiya va iqlim o‘zgarishi milliy qo‘mitasi raisi o‘rinbosari Iskandar Qutbiddinovning ma’lum qilishicha, ushbu hodisa kunduzgi va kechki havo haroratining ayrim hollarda 14 gradusgacha keskin farq qilishi, tuman tushishi, shamol tezligini pasayishi natijasida ifloslantiruvchi moddalarning atmosfera havosida tarqalishini qiyinlashtirmoqda.

Mutaxassislarning tahlillariga ko‘ra, noqulay meteorologik sharoitlar 16—17-yanvarga qadar saqlanishi kutilmoqda. Antisiklonlar kelishi natijasida yog‘ingarchilik yog‘ishi va shamol tezligi oshishi bilan atmosfera havosi sifati normallashuvi kutilmoqda.

“O‘zgidromet” axborotida keltirilishicha, 8-yanvar kuni soat 09:00 holatiga ko‘ra, Toshkent shahrining atmosfera havosidagi PM10 mayda dispersli zarrachalarning miqdori ruxsat etilgan me’yorlardan oshmadi. PM2,5 mayda dispersli zarrachalar miqdori 101 mkg/m3 ni tashkil etdi, ruxsat etilgan me’yorlardan (60 mkg/m3) 1,7 marta oshgan.

Iskandar Qutbiddinovning qayd etishicha, maxsus komissiya ekologik holat yuzasidan aholiga muntazam axborot berish bilan birga tegishli tashkilotlar faoliyatini muvofiqlashtirmoqda. Bugungi kunda maxsus komissiyasining e’tibori sanoat va xo‘jalik obyektlarida ekologik reydlar va nazorat tadbirlariga qaratilgan.

Noqulay ob-havo sharoitida atmosfera havosiga antropogen (ya’ni insoniy faoliyat)ning yuklamasini kamaytirish uchun korxonalarning quvvatlari cheklanmoqda va ayrimlarining faoliyati to‘xtatilmoqda.

1—7-yanvar kunlari Toshkent shahridagi 12 ta va Toshkent viloyatidagi 22 ta ishlab chiqarish korxonasida tekshiruvlar o‘tkazildi hamda ta’sirchan choralar ko‘rilgan. Atmosfera havosini ifloslantirgan o‘nlab avtotransport vositalariga nisbatan ma’muriy choralar qo‘llanilgan. Shu bilan birga, profilaktik choralar ham amalga oshirilmoqda: tashlama manbalari ustidan monitoring kuchaytirildi, atmosfera havosi sifati tezkor baholab borilmoqda.

“Maxsus komissiya tomonidan ekologik reydlar va monitoring tadbirlari inversiya yakunlangach ham davom ettiriladi. Ko‘rilayotgan barcha choralar yuzaga kelgan xavflarni minimallashtirish hamda aholining ekologik xavfsizligini ta’minlashga qaratilgan. Barcha chora-tadbirlar ilmiy asoslangan tavsiyalarga qat’iy rioya qilgan holda amalga oshirib kelinmoqda”, – dedi Ekologiya va iqlim o‘zgarishi milliy qo‘mitasi raisi o‘rinbosari.

Harorat inversiyasi qisqa muddatli va oldindan prognoz qilinadigan meteorologik hodisa bo‘lib, bu davrda davlat tashkilotlari kuchaytirilgan rejimda ish olib boradi va ifloslanishni yumshatish uchun sinovdan o‘tgan chora-tadbirlar amalga oshiriladi.

• Davlat ekologiya qo'mitasi
• Havo
• Ifloslanish