O‘zbekistonning Istanbul shahridagi Bosh konsulxonasi Turkiyada bo‘lib turgan o‘zbekistonliklarni shaxsiy mas’uliyatni oshirish va bir qator xavfsizlik talablariga rioya etishga chaqirdi. 

- kundalik turmushingizda sog‘liq va hayotingizga zarar yetkazishi mumkin bo‘lgan shubhali vaziyatlardan uzoqda bo‘ling. Ommaviy yig‘in va namoyishlarda qatnashishdan saqlaning, shuningdek, odamlar gavjum joylarda hushyorlikni yanada oshiring;

- qonuniy huquq va manfaatlaringiz har qanday shaklda buzilsa, og‘ir yoki favqulodda holatga tushib qolsangiz zudlik bilan mahalliy huquq-tartibot organlariga 155 (Politsiya) yoki 156 (Jandarmeriya) qisqa raqamlari orqali, shuningdek, Bosh konsulxona 24/7 ishonch telefoniga murojaat eting;

- agar siz va yaqinlaringizni mahalliy huquq-tartibot idoralari qo‘lga olsa, ozodligingizni cheklasa yoki ayb e’lon qilsa advokat himoyasini talab qilish, yaqinlaringizga telefon orqali xabar berish yoki Bosh konsulxona bilan bog‘lanishga haqlisiz;

- pul evaziga Turkiyada bo‘lish hujjatlarini rasmiylashtirish va mo‘may daromadli ish, shuningdek, Amerika va Yevropa davlatlari vizalarini va’da qilayotgan firibgarlardan ehtiyot bo‘ling;

- rasmiy ruxsatnomasi bo‘lmagan taksi xizmatlaridan foydalanmang (ayniqsa, ayol va yolg‘iz kishilar).

“Hurmatli vatandoshlar, sizning huquq va manfaatlaringiz davlat himoyasidadir!”, – deyiladi xabarda.

• Konsullik
• Ogohlantirish
• O‘zbekiston
• Turkiya
• fuqaro